ലോക ഹോക്കി റാങ്കിങിൽ മൂന്നാം സ്ഥാനത്തെത്തി ഇന്ത്യൻ ഹോക്കി ടീം. 41 വര്‍ഷത്തിനുശേഷം ഒളിംപിക്സ് ഹോക്കിയില്‍ വെങ്കലം നേടി ചരിത്രനേട്ടം സ്വന്തമാക്കിയ ഇന്ത്യന്‍ പുരുഷ ടീമിന്‍റെ എക്കാലത്തെയും മികച്ച റാങ്കിംഗാണിത്. ഒളിമ്പിക്‌സ് സ്വർണമെഡൽ ജേതാക്കളായ ബെൽജിയമാണ് ഇന്ത്യയ്ക്ക് മുന്നിൽ രണ്ടാം സ്ഥാനത്ത്. ഓസ്ട്രേലിയ ആണ് ഒന്നാം സ്ഥാനത്ത്. ന്ത്യക്ക് പിന്നില്‍ നെതര്‍ലന്‍ഡ്സ് നാലാമതും ജര്‍മനി അഞ്ചാമതുമാണ്.
ഏഷ്യയിൽ നിന്ന് ദക്ഷിണ കൊറിയ പതിനാറാമതും ജപ്പാന്‍ പതിനേഴാമതുമാണ്. പാകിസ്ഥാൻ പതിനെട്ടാം സ്ഥാനത്താണ്. പുരുഷ റാങ്കിംഗില്‍ എക്കാലത്തെയും മികച്ച നേട്ടം സ്വന്തമാക്കിയെങ്കിലും വനിതകളുടെ റാങ്കിംഗില്‍ ഇന്ത്യക്ക് നേരിയ തിരിച്ചടി നേരിട്ടു. ഒരു സ്ഥാനം താഴേക്കിറങ്ങിയ വനിതാ ടീം പുതിയ റാങ്കിംഗില്‍ ഒമ്പതാം സ്ഥാനത്താണുള്ളത്. നെതർലാൻഡ്‌സാണ് വനിതകളിൽ ഒന്നാം സ്ഥാനത്തുള്ളത്. ഇംഗ്ലണ്ട് രണ്ടാമതും ഒളിംപിക്സ് വെള്ളി മെഡല്‍ ജേതാക്കളായ അര്‍ജന്‍റീന മൂന്നാം സ്ഥാനത്തുമാണ്. ഓസ്ട്രേലിയ ജർമനി എന്നിവരാണ് നാലും അഞ്ചും സ്ഥാനങ്ങളിൽ.
