അദാനി ഗ്രൂപ്പിലെ മറ്റൊരു കമ്പനിയുടെ വിപണി മൂല്യം കൂടി ഒരു ലക്ഷം കോടി രൂപ കടന്നു. വിപണിമൂല്യം ഒരു ലക്ഷം കോടി കടക്കുന്ന അദാനി ഗ്രൂപ്പ് കമ്പനികളിലെ ആറാമത് കമ്പനിയായി മാറിയിരിക്കുകയാണ് അദാനി പവർ. തിങ്കളാഴ്ച രാവിലത്തെ വ്യാപാരത്തിനിടെ 270.80 രൂപയിലേയ്ക്ക് ഓഹരി വില ഉയര്‍ന്നതാണ് കമ്പനി നേട്ടമാക്കിയത്.
കഴിഞ്ഞ വ്യാപാരദിനത്തിലെ ക്ലോസിങ് നിരക്കിനേക്കാള്‍ അഞ്ചുശതമാനമാണ് ഓഹരി വിലയില്‍ കുതിപ്പുണ്ടായത്. ഈ വർഷം മാത്രം ഓഹരിവിലയിൽ 165 ശതമാനത്തിന്റെ വർധനവാണ് അദാനി പവറിൽ ഉണ്ടായത്.
അദാനി ഗ്രീന്‍ എനര്‍ജി, അദാനി ട്രാന്‍സ്മിഷന്‍, അദാനി ടോട്ടല്‍ ഗ്യാസ്, അദാനി എന്റര്‍പ്രൈസസ്, അദാനി പോര്‍ട്‌സ് ആന്‍ഡ് സ്‌പെഷല്‍ ഇക്കണോമിക് സോണ്‍ എന്നീ അദാനി ഗ്രൂപ്പ് കമ്പനികൾ നേരത്തെ തന്നെ ഈ നാഴികകല്ല് പിന്നിട്ടിരുന്നു.
