സ്വർണവിലയിൽ വീണ്ടും കുതിപ്പ്, രണ്ട് ദിവസം കൊണ്ട് കൂടിയത് 680 രൂപ

സംസ്ഥാനത്ത് സ്വർണവിലയിൽ തുടർച്ചയായ രണ്ടാം ദിനവും വർധന. പവന് 200 രൂപയാണ് ഇന്ന് കൂടിയത്. ഒരു പവൻ സ്വർണത്തിന്റെ വില 38,560 രൂപയായി. ഗ്രാമിന് 25 രൂപ കൂടി 4820 ആയി.

ഇന്നലെ പവന് 480 രൂപ വരെ ഉയർന്നിരുന്നു. രണ്ട് ദിവസം കൊണ്ട് 680 രൂപയുടെ വർധനവാണ് ഉണ്ടായത്. യുക്രെയ്‌ൻ യുദ്ധത്തെ തുടർന്ന് കുതിച്ചുയർന്ന സ്വർണവിലയിൽ കഴിഞ്ഞ ദിവസങ്ങളിലായി ഏറ്റകുറച്ചിലുകൾ പ്രകടമാണ്. വരും ദിവസങ്ങളിലും ചാഞ്ചാട്ടം പ്രകടിപ്പിക്കാനാണ് സാധ്യതയെന്നാണ് വിപണി വിദഗ്‌ധരുടെ വിലയി‌രുത്തൽ.