വരന്റെ മുൻപിൽവച്ച് വധുവിനെ ചുംബിച്ച് കാമുകൻ, പിന്നെ നടന്നത് കൂട്ടത്തല്ല്, ഒടുവിൽ സിനിമ സ്റ്റൈലിൽ ക്ലൈമാക്സ്

തെലങ്കാനയിലെ ഒരു വിവാഹത്തിൽ ഉണ്ടായത് സിനിമയെ വെല്ലുന്ന നാടകീയ സംഭവങ്ങൾ. വരനോടൊപ്പം വാഹനത്തിൽ പോവുകയായിരുന്ന വധുവിനെ വിളിച്ചിറക്കി വരന്റെ മുൻപിൽവച്ച് തന്നെ കാമുകൻ ചുംബിയ്ക്കുകയായിരുന്നു. ഇതോടെ രംഗം മോശമായി. ഹുസൂരാബാദിലാ സംഭവം നടന്നത്. ബന്ധുക്കൾ നിശ്ചയിച്ച വിവാഹത്തിന് യുവതി വഴങ്ങുകയായിരുന്നു. 

എന്നാൽ വിവാഹഘോഷയാത്രയില്‍ വരനും വധുവും കാറിൽ പോകുന്നതിനിടെ ഗോഷയാത്രയിലേക്ക് കയറി കാമുകൻ കാർ തടഞ്ഞുനിർത്തി. വധുവിനെ വലിച്ചിറക്കിയ ശേഷം 'ഇവൾ എന്റേതാണ് നിങ്ങൾക്കെങ്ങനെ സ്വന്തമാക്കാനാകും' എന്ന് വരനോട് ചോദിച്ച് കാമുൻ യുവതിയെ ചുംബിച്ചു. ഇതോടെ വരനും കാമുകനും തമ്മിൽ ഉന്തും തള്ളും ആരംഭിച്ചു. രംഗം കൂട്ടത്തല്ലിലേയ്ക്ക് നീങ്ങിയതോടെ വരൻ പരാതിപ്പെട്ടതിനെ തുടർന്ന് പൊലീസ് എത്തി. 

മദ്യപിച്ചെത്തി വരനെയും വധുവിനെയും കയ്യേറ്റം ചെയ്തു എന്ന പരാതിയിൽ കാമുകനെ പൊലീസ് അറസ്റ്റ് ചെയ്തു. ഇതോടെ ആതുവരെ ഒന്നും മിണ്ടാതെ നിന്ന യുവതി കാമുകനൊപ്പം പോകാനാണ് തനിക്ക് താൽപര്യം എന്ന് പൊലീസിനോട് തുറന്നുപറയുകയായിരുന്നു. മാനക്കേടുണ്ടാക്കിയ മകളെ വേണ്ടെന്ന് പറഞ്ഞ് യുവതിയെ കുടുംബം പൊലീസ് സ്റ്റേഷനില്‍ ഉപേക്ഷിച്ചു. പൊലീസ് യുവതിയെ അഭയ കേന്ദ്രത്തിലേയ്ക്ക് മാറ്റിയിരിയ്ക്കുകയാണ്.