തനുശ്രീ ദത്തയുടെ വെളിപ്പെടുത്തലിനുശേഷം ഞെട്ടിക്കുന്ന തുറന്നു പറച്ചിലുമായി നടി കങ്കണാ റണാവത്ത്. സൂപ്പർ ഹിറ്റ് ചിത്രം ക്വീനിന്റെ സംവിധായകൻ വികാസ് ബഹലിനെതിരെയാണ് കങ്കണ ആരോപണം ഉന്നയിച്ചിരിക്കുന്നത്. വികാസ് ബഹലിനെതിരെ മറ്റൊരു പെൺകുട്ടി പീഡന പരാതി നൽകിയിരുന്നു. പരാതി ഉന്നയിച്ച പെൺകുട്ടിയെ താൻ പിന്തുണയ്ക്കുന്നുവെന്നും അത് സത്യമാകുമെന്നും കങ്കണ അടുത്തിടെ ഒരു അഭിമുഖത്തിൽ പറഞ്ഞു.
വികാസ് സംവിധാനം ചെയ്ത ക്വീനിൽ കങ്കണ ആയിരുന്നു നായിക. ചിത്രത്തിന്റെ ലൊക്കെഷനിൽ വെച്ച് തനിക്കുണ്ടായ അനുഭവങ്ങളും താരം തുറന്നു പറയുന്നുണ്ട്. 2014ൽ വിവാഹം കഴിഞ്ഞിട്ടും ക്വീൻ ചിത്രീകരിക്കുന്ന സമയത്ത് ദിവസവും ഓരോരുത്തരുമായി ലൈംഗീകബന്ധത്തിലേർപ്പെട്ടതിന്റെ കാര്യങ്ങൾ അയാൾ പറയുമായിരുന്നു.
‘കാണുമ്പോഴൊക്കെ അയാൾ എന്നെ ഇറുക്കി ചേർത്തുനിർത്തി എന്റെ മുടിയിൽ മണക്കും. എന്റെ കഴുത്തിൽ അയാൾ മുഖം അമർത്തും. നിന്റെ മുടിയുടെ ഗന്ധം എനിക്ക് ഇഷ്ടമാണെന്ന് പറയും. എപ്പോഴും ബലം പ്രയോഗിച്ച് അയാളെ അകറ്റി നിർത്തുമായിരുന്നു. ഇയാൾക്കെന്തോ കുഴപ്പമുണ്ടെന്ന് അപ്പോഴൊക്കെ തോന്നിയിട്ടുണ്ട്.‘- കങ്കണ തുറന്നു പറയുന്നു.
അനുരാഗ് കശ്യപും വികാസ് ബാഹലും ഉൾപ്പെടെ നാലു പേർചേർന്ന് സ്ഥാപിച്ച ഫാന്റം ഫിലിംസ് എന്ന പ്രൊഡക്ഷൻ കമ്പനിയിലെ മുൻ ജീവനക്കാരിയാണ് വികാസിനെതിരെ ആരോപണം ഉന്നയിച്ചത്. ഇതേ തുടർന്ന് ഫാന്റം ഫിലിംസ് പിരിച്ചുവിട്ടിരുന്നു.
