അർദ്ധരാത്രിയിൽ കൂടെ വരണമെന്ന് പൊലീസ് ഉദ്യോഗസ്ഥർ, പറ്റില്ലെന്ന് യുവതി; ലിഫ്‌റ്റിൽ നടന്നത്- വീഡിയോ

സെക്യൂരിറ്റിയുമായുള്ള വഴക്കിനെ തുടർന്ന് പൊലീസ് സ്‌റ്റേഷനിലേക്ക് വരാൻ ആവശ്യപ്പെടുന്ന പൊലീസുകാരുടെ വീഡിയോയാണ് ഇപ്പോൾ വൈറലായിക്കൊണ്ടിരിക്കുന്നത്. പരാതി നൽകുന്നതിനായി തങ്ങളുടെ കൂടെ വരണമെന്ന് യുവതിയോട് ആവശ്യപ്പെടുകയും എന്നാൽ അതിന് തനിക്ക് കഴിയില്ലെന്നും പറഞ്ഞ് ലിഫ്‌റ്റിനകത്തു കയറിയ യുവതിയുമായുള്ള മുംബൈ പൊലീസിന്റെ വീഡിയോയാണ് വൈറലായിരിക്കുന്നത്. സെക്യൂരിറ്റിയുമായി വഴക്കായതിനെത്തുടർന്ന് യുവതി തന്നെയാണ് പൊലീസിനെ വിളിച്ചത്.

അതേസമയം, സംഭവത്തെത്തുടർന്ന് മോഡലും കണ്ടന്റ് റൈറ്ററുമായ യുവതി ട്വിറ്ററിൽ പോസ്‌റ്റ് ചെയ്യുകയും ചെയ്‌തിട്ടുണ്ട്. പരാതി നൽകുന്നതിനായി പൊലീസ് സ്‌റ്റേഷനിലേക്ക് ചെല്ലാൻ പറഞ്ഞെങ്കിലും ആ സമയത്ത അവരുടെ കൂടെ പോകാൻ തനിക്ക് തോന്നിയില്ലെന്നും അവരുടെ കൂടെ ഒരു വനിതാ പൊലീസ് പോലും ഇല്ലെന്നും കുറിപ്പിൽ യുവതി പറയുന്നു.

രാത്രിയിൽ പുറത്തേക്കുപോകുന്നതും വരുന്നതുമായി സംസാരിക്കുന്നതിനെത്തുടർന്ന് യുവതിയും സെക്യൂരിറ്റി ഗാർഡും തമ്മിൽ വാക്കുതർക്കം ഉണ്ടായിരുന്നെന്ന് റിപ്പോർട്ടുകൾ പറയുന്നു. അതിന് ശേഷം യുവതി പൊലീസിനെ വിളിക്കുകയും സെക്യൂരിറ്റി തന്നോട് മോശമായി പെരുമാറി എന്നും പറഞ്ഞു. എന്നാൽ സെക്യൂരിറ്റി പറയുന്നത് യുവതി തന്നോട് മോശമായി പെരുമാറി എന്നായിരുന്നു.