ബ്‌ലെസിക്കും ടീമിനുമൊപ്പം പ്രവര്‍ത്തിക്കാനായതില്‍ സന്തോഷം, ആടുജീവിതം മലയാളത്തിന്റെ ലോറന്‍സ് ഓഫ് അറേബ്യയെന്ന് എ ആര്‍ റഹ്മാന്‍

സിനിമാപ്രേമികള്‍ ഈ വര്‍ഷം ഏറ്റവും ആകാംക്ഷയോടെ കാത്തിരിക്കുന്ന സിനിമകളിലൊന്നാണ് പൃഥ്വിരാജ് ബ്ലെസി സിനിമയായ ആടുജീവിതം. മലയാളത്തില്‍ ഏറ്റവും കൂടുതല്‍ കോപ്പികള്‍ വിറ്റഴിഞ്ഞിട്ടുള്ള ആടുജീവിതം എന്ന നോവലിനെ ആസ്പദമാക്കിയാണ് സിനിമയൊരുങ്ങുന്നത്. 8 വര്‍ഷക്കാലമെടുത്താണ് സിനിമയുടെ ഷൂട്ട് ചെയ്തത്. ചിത്രത്തിന് വേണ്ടി പൃഥ്വിരാജ് 30 കിലോയോളം തൂക്കം കുറച്ചിരുന്നു.

ഇപ്പോഴിതാ സിനിമയുടെ ഒഫീഷ്യല്‍ വെബ്‌സൈറ്റ് ലോഞ്ച് ചെയ്യുന്ന പരിപാടിക്കിടെ സിനിമയെ പ്രശംസിച്ച് രംഗത്ത് വന്നിരിക്കുകയാണ് സിനിമയുടെ സംഗീതസംവിധായകനായ എ ആര്‍ റഹ്മാന്‍. മലയാളത്തിന്റെ ലോറന്‍സ് ഓഫ് അറേബ്യയായി മാറാന്‍ ആടുജീവിതത്തിന് സാധിക്കുമെന്ന് റഹ്മാന്‍ പറഞ്ഞു. ഒരുപാട് കാലത്തിന് ശേഷമാണ് ഒരു മലയാള സിനിമയ്ക്ക് വേണ്ടി വര്‍ക്ക് ചെയ്യുന്നത്. യോദ്ധയ്ക്ക് ശേഷം ഫഹദ് ഫാസിലിനൊപ്പം മലയന്‍ കുഞ്ഞ് എന്ന സിനിമയില്‍ വര്‍ക്ക് ചെയ്തു. പക്ഷേ ആടുജീവിതം അതിന് മുന്‍പേ തുടങ്ങിയ വര്‍ക്കാണ്.

ബ്ലെസിക്കൊപ്പം വര്‍ക്ക് ചെയ്തതില്‍ സന്തോഷമുണ്ട്. ബെന്യാമിന്‍,പൃഥ്വിരാജ് അതുപോലെ സിനിമയ്ക്കായി പ്രവര്‍ത്തിച്ചവരെല്ലാവരും അവരുടെ ആത്മാവ് തന്നെ സിനിമയ്ക്കായി നല്‍കിയിട്ടുണ്ട്.മലയാളത്തിന്റെ ലോറന്‍സ് ഓഫ് അറേബ്യയാണ് ബ്ലെസി ചെയ്തുവെച്ചിരിക്കുന്നത്. റഹ്മാന്‍ പറഞ്ഞു. പൃഥ്വിരാജിനെ കൂടാത അമല പോള്‍,ജിമ്മി ജീന്‍ ലൂയിസ്,റിക് അബി,ശോഭാ മോഹന്‍ എന്നിവരാണ് സിനിമയിലെ മറ്റ് പ്രധാന കഥാപാത്രങ്ങള്‍.