മമ്മൂട്ടി കരഞ്ഞാല്‍ മലയാളികളും കരയും, ആ കാഴ്ചയാണ് 'കാതല്‍' പ്രദര്‍ശിപ്പിക്കുന്ന തിയറ്ററുകളില്‍ കാണാനാകുന്നത്. സിനിമയുടെ പ്രമേയത്തിനും മമ്മൂട്ടിയുടെ പ്രകടനത്തിനും അഭിനന്ദന പ്രവാഹമാണ് വന്നുകൊണ്ടിരിക്കുന്നത്. കാതല്‍ സിനിമയെ പ്രശംസിച്ച് തെന്നിന്ത്യന്‍ താരം സമാന്ത റൂത്ത് പ്രഭു എത്തിയിരിക്കുകയാണ്.നടി എഴുതിയ കുറിപ്പാണ് സാമൂഹ്യ മാധ്യമങ്ങളില്‍ വൈറലാകുന്നത്.
ഈ വര്‍ഷത്തെ ഏറ്റവും മികച്ച സിനിമ എന്നാണ് നടി മമ്മൂട്ടി ചിത്രത്തെക്കുറിച്ച് എഴുതിയത്. 'ഈ വര്‍ഷമിറങ്ങിയതില്‍ മികച്ച സിനിമ. നിങ്ങള്‍ ദയവുചെയ്ത് ഇതൊന്ന് കാണൂ. അത്രയും ശക്തവും മികച്ചതുമാണ് ചിത്രം. മമ്മൂട്ടി സാര്‍, നിങ്ങളാണ് എന്റെ ഹീറോ,' സമാന്ത ഇന്‍സ്റ്റഗ്രാം സ്റ്റോറിയില്‍ എഴുതി. സിനിമയിലെ മമ്മൂട്ടിയുടെ പ്രകടനം കുറെ കാലത്തേക്ക് മനസ്സില്‍ നിന്ന് പോകില്ലെന്നും തരം കൂട്ടിച്ചേര്‍ത്തു.ജ്യോതികയെയും ജിയോ ബേബിയെയും അഭിനന്ദിക്കാന്‍ നടി മറന്നില്ല.
മാത്യു ദേവസിയെന്ന മമ്മൂട്ടി കഥാപാത്രം സ്വവര്‍ഗാനുരാഗിയാണ്. നീണ്ട ഇടവേളയ്ക്ക് ശേഷം തമിഴ് നടി ജ്യോതിക മലയാളത്തിലേക്ക് തിരിച്ചെത്തിയത് വെറുതെയായില്ല. സുധി കോഴിക്കോട് അവതരിപ്പിച്ച തങ്കന്‍ കഥാപാത്രവും കയ്യടി വാങ്ങുന്നു.
