ഒ.ടി.ടി റിലീസില്‍ നേട്ടം കൊയ്ത് 'ബിരിയാണി',24 മണിക്കൂറിനുള്ളില്‍ 50,000 ല്‍ കൂടുതല്‍ കാഴ്ചക്കാര്‍

നടി കനികുസൃതിക്ക് മികച്ച നടിക്കുള്ള സംസ്ഥാന പുരസ്‌കാരം നേടിക്കൊടുത്ത ചിത്രമാണ് ബിരിയാണി. തീയറ്ററുകളില്‍ റിലീസ് ചെയ്‌തെങ്കിലും വലിയ പ്രേക്ഷകശ്രദ്ധ സിനിമയ്ക്ക് നേടാനായില്ല. നിരവധി ദേശീയ അന്തര്‍ദേശീയ പുരസ്‌കാരങ്ങള്‍ നേടിയ ബിരിയാണി കഴിഞ്ഞ ദിവസമാണ് ഒ.ടി.ടി റിലീസ് ചെയ്തത്. കേവ് എന്ന പേരിലുള്ള ഒ.ടി.ടി പ്ലാറ്റ്‌ഫോമിലൂടെ സിനിമയ്ക്ക് മികച്ച പ്രതികരണമാണ് ലഭിക്കുന്നത്. ആദ്യ 24 മണിക്കൂറിനുള്ളില്‍ തന്നെ 50000 ത്തില്‍ കൂടുതല്‍ കാണികളെ സ്വന്തമാക്കാനായി എന്ന് കേവ് ടീം ഔദ്യോഗികമായി അറിയിച്ചു.

സിനിമ ഒരു തവണ കാണുവാനായി 99 രൂപയാണ് കാണിയില്‍ നിന്ന് ഈടാക്കുന്നത്.മുസ്ലിം സ്ത്രീകള്‍ നേരിടുന്ന പ്രശ്‌നങ്ങളെ കുറിച്ചാണ് സിനിമ പറയുന്നത്. ലോകമെമ്പാടുമുള്ള പ്രേക്ഷകരിലേക്ക് എത്തിക്കാനാണ് ഒ.ടി.ടി റിലീസ് ചെയ്യുന്നതെന്ന് സംവിധായകന്‍ പറഞ്ഞിരുന്നു. സുര്‍ജിത് ഗോപിനാഥ്, ശ്യാം റെജി, തോന്നക്കല്‍ ജയചന്ദ്രന്‍,ശൈലജ ജല,അനില്‍ നെടുമങ്ങാട് എന്നിവരാണ് പ്രധാന വേഷങ്ങളില്‍ എത്തുന്നത്. യുഎഎന്‍ ഫിലിം ഹൗസാണ് ചിത്രം നിര്‍മ്മിക്കുന്നത്.