പുതിയ സിനിമ പൂര്‍ത്തിയാക്കാതെയാണ് വിഖ്യാത തിരക്കഥാകൃത്തും സംവിധായകനുമായ ഡെന്നീസ് ജോസഫ് വിടവാങ്ങിയത്. നീണ്ട ഇടവേളയ്ക്ക് ശേഷം ഒരു സിനിമയ്ക്കായി തിരക്കഥയൊരുക്കുകയായിരുന്നു ഡെന്നീസ് ജോസഫ്. ഒമര്‍ ലുലുവാണ് ഈ സിനിമയുടെ സംവിധായകന്‍. മലയാള സിനിമയിലെ ഒരു സൂപ്പര്‍ താരത്തെ കേന്ദ്ര കഥാപാത്രമാക്കി തട്ടുപൊളിപ്പന്‍ മാസ് ചിത്രം ഒരുക്കുമെന്നായിരുന്നു ഡെന്നീസ് ജോസഫിന്റെയും ഒമര്‍ ലുലുവിന്റെയും അവകാശവാദം. ഈ സിനിമ പൂര്‍ത്തിയാക്കാന്‍ കാത്തുനില്‍ക്കാതെയാണ് മലയാളികള്‍ക്ക് പ്രിയപ്പെട്ട ഡെന്നീസ് വിടവാങ്ങുന്നത്. ഏഴ് വര്‍ഷങ്ങള്‍ക്ക് ശേഷമാണ് ഡെന്നീസ് ജോസഫ് ഒരു സിനിമയ്ക്ക് തിരക്കഥയൊരുക്കുന്നത്. 2013 ല്‍ പ്രിയദര്‍ശന്റെ സംവിധാനത്തില്‍ പുറത്തിറങ്ങിയ മോഹന്‍ലാല്‍ ചിത്രം 'ഗീതാഞ്ജലി'യുടെ തിരക്കഥ ഡെന്നീസ് ജോസഫിന്റേതായിരുന്നു.
ഹൃദയാഘാതത്തെ തുടര്‍ന്നാണ് ഡെന്നീസ് ജോസഫ് അന്തരിച്ചത്. മലയാള സിനിമയിലെ എക്കാലത്തെയും ഹിറ്റുകളുടെ തമ്പുരാനാണ് വിടവാങ്ങിയത്. കോട്ടയത്തെ സ്വകാര്യ ആശുപത്രിയില്‍ വച്ചാണ് അന്ത്യം. വീട്ടില്‍ കുഴഞ്ഞുവീണ അദ്ദേഹത്തെ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിക്കുകയായിരുന്നു.
മമ്മൂട്ടിയ്ക്കും മോഹന്‍ലാലിനും ഏറ്റവും മികച്ച വേഷങ്ങള്‍ നല്‍കിയ തിരക്കഥാകൃത്താണ് ഡെന്നീസ് ജോസഫ്. രാജാവിന്റെ മകന്‍ എന്ന ചിത്രത്തിലൂടെയാണ് മോഹന്‍ലാല്‍ സൂപ്പര്‍താര പരിവേഷം സ്വന്തമാക്കിയത്. ന്യൂഡല്‍ഹിയിലൂടെ മമ്മൂട്ടിക്ക് ഗംഭീര തിരിച്ചുവരവ് സമ്മാനിച്ച താരം കൂടിയാണ് ഡെന്നീസ് ജോസഫ്.
നിറക്കൂട്ട്, രാജാവിന്റെ മകന്‍, ന്യൂഡല്‍ഹി, മനു അങ്കിള്‍, കോട്ടയം കുഞ്ഞച്ചന്‍, ആകാശദൂത് തുടങ്ങി നിരവധി ഹിറ്റ് ചിത്രങ്ങള്‍ക്ക് തിരക്കഥയൊരുക്കിയത് ഡെന്നീസ് ജോസഫാണ്. അഗ്രജന്‍, തുടര്‍ക്കഥ, അപ്പു, അഥര്‍വ്വം, മനു അങ്കിള്‍ എന്നീ ചിത്രങ്ങള്‍ സംവിധാനം ചെയ്തിട്ടുമുണ്ട്.
