സമീപകാലത്തായി ഏറ്റവുമധികം വാര്‍ത്തകളില്‍ നിറഞ്ഞുനില്‍ക്കുന്ന സിനിമാതാരം ഷെയ്‌ന്‍ നിഗമാണ്. നിര്‍മ്മാതാക്കളുമായുള്ള പ്രശ്നങ്ങള്‍ ഒന്നടങ്ങുമ്പോള്‍ അടുത്തത് എന്ന രീതിയില്‍ വന്നുകൊണ്ടിരിക്കുന്നു. പണം കൂടുതല്‍ തന്നില്ലെങ്കില്‍ ഡബ്ബ് ചെയ്യില്ല എന്ന് ഒരു സിനിമയുടെ നിര്‍മ്മാതാവിനോട് ഷെയ്‌ന്‍ ആവശ്യപ്പെട്ടതാണ് പുതിയ വാര്‍ത്ത.
എന്നാല്‍ ഈ വിവാദങ്ങള്‍ ഷെയ്‌നിന്‍റെ കരിയറിനെ സാരമായി ബാധിച്ചുതുടങ്ങിയെന്നാണ് റിപ്പോര്‍ട്ടുകള്‍ പറയുന്നത്. ഷെയ്‌നിന് ഇപ്പോള്‍ നിര്‍മ്മാതാക്കളുടെ വിലക്ക് നിലനില്‍ക്കുന്നുണ്ട്. നേരത്തേ പ്രഖ്യാപിച്ച പല പ്രൊജക്‍ടുകളില്‍ നിന്നും ഷെയ്‌നിനെ മാറ്റുന്ന സാഹചര്യവും നിലനില്‍ക്കുന്നുണ്ട്.
‘ഉണ്ട’യ്‌ക്ക് ശേഷം ഖാലിദ് റഹ്മാന് സംവിധാനം ചെയ്യാനിരുന്നത് ഒരു ഷെയ്‌ന്‍ നിഗം ചിത്രമാണ്. എന്ന ആ പ്രൊജക്‍ട് വേണ്ടെന്നുവച്ചിട്ട് ഖാലിദ് റഹ്മാന് ഒരു ദിലീപ് ചിത്രം ചെയ്യാനുള്ള ഒരുക്കത്തിലാണ് ഇപ്പോള്‍. ഗോകുലം ഗോപാലനാണ് ഈ സിനിമ നിര്‍മ്മിക്കാനായി രംഗത്തെത്തിയിരിക്കുന്നത്.
ദിലീപിനെ നായകനാക്കി ഒരു റിയലിസ്റ്റിക് കോമഡിച്ചിത്രമാണ് ഖാലിദ് റഹ്‌മാന്‍റെ മനസില്‍ എന്നാണ് സൂചന. ചിത്രത്തിന്‍റെ പ്രഖ്യാപനം ഉടനുണ്ടാകും.
നാദിര്‍ഷ സംവിധാനം ചെയ്യുന്ന ‘കേശു ഈ വീടിന്‍റെ നാഥന്‍’ എന്ന ചിത്രത്തിന് ശേഷം ദിലീപ് അഭിനയിക്കുന്നത് ഖാലിദ് റഹ്‌മാന്‍റെ സിനിമയിലായിരിക്കും.