ലോക സിനിമാപ്രേമികളെ അമ്പരപ്പിച്ച ദൃശ്യവിസ്മയമായ അവതാര്‍ സിനിമയുടെ മൂന്നാം ഭാഗത്തിന്റെ പേരും റിലീസ് തീയ്യതിയും പുറത്ത്. ജെയിംസ് കാമറൂണ്‍ സംവിധാനം ചെയ്ത അവതാര്‍ അന്ന് വരെയുണ്ടായിരുന്ന സകല റെക്കോര്‍ഡുകളും തിരുത്തിയെഴുതിയ സിനിമയായിരുന്നു. സിനിമയുടെ മൂന്നാം ഭാഗമായ ഫയര്‍ ആന്‍ഡ് ആഷ് 2025 ഡിസംബര്‍ 19നാണ് തിയേറ്ററുകളിലെത്തുക.
ചിത്രത്തിന്റെ ടൈറ്റില്‍ പോസ്റ്റര്‍ അണിയറപ്രവര്‍ത്തകര്‍ പുറത്തുവിട്ടു. പാണ്ടോറയിലേക്ക് തിരിച്ചുപോകാന്‍ തയ്യാറായികൊളു എന്ന കുറിപ്പിലാണ് ഡിസ്‌നിയുടെ പ്രഖ്യാപനം. നിരവധി ആരാധകരാണ് പോസ്റ്റിന് കീഴില്‍ കമന്റുകളുമായി എത്തിയിരിക്കുന്നത്.
2009ലായിരുന്നു അവതാര്‍ ആദ്യ ഭാഗം റിലീസ് ചെയ്തത്. ഇത് അന്നത്തെ ഏറ്റവും വലിയ പണം വാരി സിനിമയായി മാറിയിരുന്നു. 2022ലാണ് സിനിമയുടെ രണ്ടാം ഭാഗമായ അവതാര്‍: വേ ഓഫ് വാട്ടര്‍ റിലീസ് ചെയ്തത്. അഞ്ച് ഭാഗങ്ങളിലായാണ് അവതാര്‍ ഇറങ്ങുക. അവതാര്‍ നാലാം ഭാഗം 2029ലും അഞ്ചാം ഭാഗം 2031ലുമാകും റിലീസ് ചെയ്യുക.
