കാർത്തിക് സുബ്ബരാജ്- സൂര്യ ചിത്രത്തിൽ മലയാളത്തിൽ നിന്നും ജോജുവിനൊപ്പം ജയറാമും, ക്യാരക്ടർ പോസ്റ്റർ പുറത്ത്

Jayaram, Joju

സൂര്യയും കാര്‍ത്തിക് സുബ്ബരാജും ആദ്യമായി ഒന്നിക്കുന്ന സിനിമയുടെ ക്യാരക്ടര്‍ പോസ്റ്റുകള്‍ പുറത്തുവിട്ട് സംവിധായകന്‍ കാര്‍ത്തിക് സുബ്ബരാജ്. മലയാളത്തില്‍ നിന്നും ജയറാമിനെയും ജോജുവിനെയും സ്വാഗതം ചെയ്തുകൊണ്ടുള്ള ക്യാരക്ടര്‍ പോസ്റ്ററുകളാണ് കാര്‍ത്തിക് സുബ്ബരാജ് പങ്കുവെച്ചത്. മുടി പിന്നിലേക്ക് ചീകിയൊതുക്കി കറുത്ത കണ്ണട വെച്ചുകൊണ്ട് വ്യത്യസ്ത ലുക്കിലാണ് ജയറാം പോസ്റ്ററില്‍ പ്രത്യക്ഷപ്പെടുന്നത്.

അഭിനയത്തില്‍ വൈവിധ്യവും നര്‍മ്മവും ജീവശ്വാസമാക്കിയ മനുഷ്യന്‍ എന്നാണ് ജയറാമിനെ കാര്‍ത്തിക് സുബ്ബരാജ് വിശേഷിപ്പിക്കുന്നത്. ഏത് കഥാപാത്രത്തെയും വെല്ലുന്ന മാരക സ്‌ക്രീന്‍ പ്രസന്‍സുള്ള താരമെന്ന വിശേഷണമാണ് ജോജുവിന് കാര്‍ത്തിക് നല്‍കിയിരിക്കുന്നത്. താടിയും കണ്ണടയുമായി നിഗൂഡത തോന്നിപ്പിക്കുന്ന തരത്തിലാണ് ജോജുവിന്റെ ലുക്ക്. 

 ലവ് ലാഫ്റ്റര്‍ വാര്‍ എന്ന ടാഗ്ലൈനോടെ ഒരുങ്ങുന്ന സിനിമ ആക്ഷന് പ്രാധാന്യം നല്‍കുന്ന പ്രണയകഥയാണെന്നാണ് സൂചന. പൂജ ഹെഗ്‌ഡെയാണ് സിനിമയിലെ നായിക കഥാപാത്രത്തെ അവതരിപ്പിക്കുന്നത്. സൂര്യ-ജ്യോതികയുടെ 2ഡി എന്റര്‍ടൈന്മെന്റും കാര്‍ത്തിക് സുബ്ബരാജിന്റെ സ്റ്റോണ്‍ ബെഞ്ച് ഫിലിംസും ചേര്‍ന്നാണ് സിനിമ നിര്‍വഹിക്കുന്നത്.