ബോളിവുഡിലെ പ്രശസ്ത നടിമാരിൽ ഒരാളാണ് കൃതി സനൺ. മോഡലിംഗ് വഴിയാണ് കൃതി സിനിമയിൽ എത്തിയത്. തലതൊട്ടപ്പന്മാർ ആരുമില്ലാതെയായിരുന്നു നടിയുടെ വളർച്ച. കൃതിയുടെ സഹോദരി നൂപുർ സനൺ കൂടി വെള്ളിത്തിരയിൽ അരങ്ങേറ്റം കുറിച്ചെങ്കിലും, ചേച്ചിയുടെ വിജയം സ്വന്തമാക്കാൻ അനിയത്തിക്ക് ആയില്ല. അതോടെ ബിസിനസിലേക്ക് തിരിഞ്ഞ നൂപുറിന് ഇന്ന് ഒരു ലക്ഷ്വറി വസ്ത്ര ബ്രാൻഡ് ഉണ്ട്. ഇതിനെതിരെ നിരവധി ആരോപണങ്ങളാണ് ഉയരുന്നത്.
യാതൊരു ക്വാളിറ്റിയും ഇല്ലാത്ത സാധാരണ വസ്ത്രങ്ങൾക്ക് വരെ തീ വില ഈടാക്കി, തന്റെ ബ്രാൻഡിന്റെ മറവിൽ നൂപുർ സനൺ പകൽ കൊള്ള നടത്തുകയാണെന്നാണ് റെഡിറ്റ് പോലത്തെ സമൂഹ മാധ്യമങ്ങളിൽ ഉപഭോക്താക്കൾ ആരോപിക്കുന്നത്. നുപൂർ സാനണിന്റെ ഫാഷൻ ബ്രാൻഡായ 'ലേബൽ നോബോ' പുറത്തിറക്കുന്ന വസ്ത്രങ്ങൾ ശ്രദ്ധിക്കപ്പെട്ടത്, അതിന്റെ അസാധാരണമായ വില കൊണ്ടാണ്. ഏറ്റവും സാധാരണ വസ്ത്രങ്ങൾക്ക് പോലും അമ്പരപ്പിക്കുന്ന വിലയാണ് 'ലേബൽ നോബോ' ഈടാക്കുന്നത്. ഇതിന്റെ പേരിൽ ഓൺലൈനിൽ കടുത്ത വിമർശനം നേരിടുകയാണ് ഉടമസ്ഥയായ നൂപുർ.
കൃതിയുടെ സഹോദരി നടത്തുന്ന ബ്രാൻഡ് ആയത് കൊണ്ട് വിശ്വസിച്ചു 'ലേബൽ നോബോ'യിൽ നിന്ന് ഡ്രസ്സ് ഓർഡർ ചെയ്ത ഉപഭോക്താക്കൾ, തങ്ങൾ പറ്റിക്കപ്പെട്ടുവെന്നാണ് സോഷ്യൽ മീഡിയയിൽ കുറിച്ചത്. വെബ്സൈറ്റിലെ ഏറ്റവും കുറഞ്ഞ വിലയുള്ള ഡ്രസ്സ് ഏകദേശം 7000 രൂപയാണെങ്കിൽ, ഏറ്റവും വിലയേറിയ കൂർത്ത സെറ്റ് 26,500 രൂപയാണ്. വെസ്റ്റേൺ വെയർ വിഭാഗത്തിൽ ഏറ്റവും വിലയേറിയ വസ്ത്രം 20,000 രൂപ വിലയുള്ള ഒരു സ്കർട്ട്-ക്രോപ്പ് ടോപ്പ് സെറ്റാണ്. ഏറ്റവും കുറഞ്ഞ വിലയുള്ള വസ്ത്രം 2,400 രൂപ വിലയുള്ള ഒരു ഷോർട്സ് സെറ്റാണ്.
