മമ്മൂട്ടി ലണ്ടനില്‍ പോകുന്നു, ഒരു പ്രേമപ്രശ്നം പരിഹരിക്കണം!

മമ്മൂട്ടിയുടെ സാന്നിധ്യമുണ്ടായാല്‍ മതി ഒരു സിനിമയ്ക്ക് മിനിമം ഗ്യാരണ്ടിയാണ്. അതുകൊണ്ടാണ് മമ്മൂട്ടിയുടെ കാമിയോ റോളുകള്‍ പല സിനിമകളെയും ബോക്സോഫീസില്‍ രക്ഷപ്പെടുത്തുന്നത്. അധികം അതിഥിവേഷങ്ങളിലൊന്നും മമ്മൂട്ടി അഭിനയിച്ചിട്ടില്ലെങ്കിലും അഭിനയിച്ചതൊക്കെ പ്രേക്ഷകര്‍ എന്നും ഓര്‍ത്തിരിക്കുന്നത് തന്നെയാണ്.

രഞ്ജിത് സംവിധാനം ചെയ്യുന്ന ‘ബിലാത്തിക്കഥ’ എന്ന ചിത്രത്തില്‍ മമ്മൂട്ടി അതിഥി താരമായി അഭിനയിക്കുന്നുണ്ട്. 10 ദിവസമാണ് ഈ പ്രൊജക്ടിനായി മമ്മൂട്ടി നല്‍കിയിരിക്കുന്നത്. 2018 മാര്‍ച്ച് - ഏപ്രില്‍ മാസങ്ങളിലായി ലണ്ടനില്‍ ചിത്രീകരണം നടക്കും. 2017 ഒക്ടോബറില്‍ ലണ്ടനില്‍ ചിത്രീകരണം നടക്കേണ്ട സിനിമയായിരുന്നു ഇത്. എന്നാല്‍ ചില പ്രത്യേക കാരണങ്ങളാല്‍ ചിത്രീകരണം മാറ്റുകയായിരുന്നു.

അനു സിത്താരയും മണിയന്‍‌പിള്ള രാജുവിന്‍റെ മകന്‍ നിരഞ്ജനുമാണ് ബിലാത്തിക്കഥയിലെ ജോഡി. അനധികൃതമായി യുകെയില്‍ കുടിയേറിയ യുവാവിനെയാണ് നിരഞ്ജന്‍ അവതരിപ്പിക്കുന്നത്. യുകെയില്‍ ജോലി ചെയ്യുന്ന പെണ്‍കുട്ടിയായി അനു വരുന്നു.

ഈ ചിത്രത്തില്‍ മമ്മൂട്ടിയുടെ കഥാപാത്രം എന്തായിരിക്കുമെന്ന് അറിവായിട്ടില്ല. സേതുവാണ് ഈ സിനിമയ്ക്ക് തിരക്കഥ രചിക്കുന്നത്. ദിലീഷ് പോത്തന്‍, കനിഹ, വി എം വിനു, ജ്യുവല്‍ മേരി തുടങ്ങിയവരും ബിലാത്തിക്കഥയിലെ താരങ്ങളാണ്.