ഒന്നല്ല, രണ്ടല്ല, ലിജോ ജോസിനൊപ്പം മൂന്നാമത് മമ്മൂട്ടി ചിത്രം കൂടി ഒരുങ്ങുന്നു, മമ്മൂട്ടി കമ്പനി ഒരുക്കുന്ന ചിത്രത്തിൽ ഫഹദ് ഫാസിലും!

ഭീഷ്‌മ‌പർവ്വത്തിന്റെ വിജയത്തിന് ശേഷം വളരെയധികം പ്രതീക്ഷയുയർത്തുന്ന പ്രൊജക്‌ടുകളാണ് മെഗാസ്റ്റാർ മമ്മൂട്ടിയുടേതായി ഒരുങ്ങുന്നത്. സോഷ്യൽ മീഡിയയിൽ തരംഗം തീർത്ത റോഷാക്ക്. റീ‌‌ലീസ് ചെയ്യാനിരിക്കുന്ന റത്തീന ചിത്രം പുഴു, ലിജോ ജോസ് ചിത്രം നൻപകൽ നേരത്ത് മയ‌ക്കം എന്നിവ ആരാധകർ വളരെയേറെ പ്രതീക്ഷകൾ വെച്ചു പുലർത്തുന്ന ചിത്രങ്ങളാണ്.

ഇപ്പോഴിതാ ലിജോ ജോസ് പെല്ലിശ്ശേരിയും മമ്മൂട്ടിയും വീണ്ടും ഒന്നിക്കുന്നുവെന്ന വാർത്തകളാണ് പുറത്തുവരുന്നത്. മമ്മൂട്ടി കമ്പനിയുടെ കീഴിൽ ഒരുക്കുന്ന ചിത്രത്തിൽ ഫഹദ് ഫാസിലും ഒരു പ്രധാനകഥാപാത്രത്തെ അവതരിപ്പിക്കും. ആമേൻ എന്ന ലിജോ ജോസ് ചിത്രത്തിന്റെ എഴുത്തുകാരനായ പിഎസ് റഫീഖിന്റെ തിരക്കഥയിലായിരിക്കും ചിത്രം ഒരുങ്ങുന്നത്.

ഒരു ബിഗ്‌ ബജറ്റ് ചിത്രമായിട്ടായിരിക്കും ലി‌ജോ ജോസ് ചിത്രം ഒരുങ്ങുന്നതെന്നാണ് പുറത്തുവരുന്ന റിപ്പോർട്ടുകൾ. പ്രൊജക്‌ടിനെ പറ്റി  ഔദ്യോഗിക സ്ഥിരീകരണം ഉടനെ ഉണ്ടാകുമെന്നാണ് പ്രതീക്ഷിക്കുന്നത്.