പുതിയ സംവിധായകര്‍ക്കു മോഹന്‍ലാല്‍ അപ്രാപ്യനാണോ? ഇതാണ് താരത്തിനു പറയാനുള്ളത്
അതേസമയം പൃഥ്വിരാജ് സുകുമാരന്‍ സംവിധാനം ചെയ്യുന്ന എംപുരാന്റെ തിരക്കിലാണ് ലാല്‍ ഇപ്പോള്‍
പുതിയ സംവിധായകര്‍ക്കൊപ്പം വര്‍ക്ക് ചെയ്യാന്‍ മോഹന്‍ലാല്‍ തയ്യാറാകുന്നില്ല എന്ന വിമര്‍ശനം പൊതുവെ ആരാധകര്‍ക്കിടയിലുണ്ട്. ന്യൂജനറേഷന്‍ സംവിധായകരുടെ ചിത്രങ്ങളില്‍ അഭിനയിക്കാന്‍ മോഹന്‍ലാല്‍ തയ്യാറാകണമെന്നാണ് ആരാധകരുടെ ആവശ്യം. ഇതേ കുറിച്ചുള്ള ചോദ്യത്തിനു ലാല്‍ പറഞ്ഞ മറുപടിയാണ് സോഷ്യല്‍ മീഡിയയില്‍ വൈറലായിരിക്കുന്നത്. തനിക്ക് ഇഷ്ടപ്പെട്ട കഥ വന്നാല്‍ തീര്‍ച്ചയായും പുതിയ സംവിധായകര്‍ക്കൊപ്പം വര്‍ക്ക് ചെയ്യുമെന്ന് കേരള കൗമുദിക്ക് നല്‍കിയ അഭിമുഖത്തില്‍ ലാല്‍ പറഞ്ഞു.
' എന്റടുത്തു പലരും വന്നു കഥകള്‍ പറയാറുണ്ട്. അതില്‍ പലതും നമ്മുടെ തന്നെ പഴയ സിനിമകളുടെ ഇന്‍ഫ്‌ളുവന്‍സിലാണ് പറയുന്നത്. അതിനെ ബ്രേക്ക് ചെയ്തു കൊണ്ടുള്ള കഥകള്‍ വന്നാല്‍ ആരുടെ ഒപ്പവും വര്‍ക്ക് ചെയ്യാന്‍ ഞാന്‍ തയാറാണ്,' മോഹന്‍ലാല്‍ പറഞ്ഞു.
അതേസമയം പൃഥ്വിരാജ് സുകുമാരന്‍ സംവിധാനം ചെയ്യുന്ന എംപുരാന്റെ തിരക്കിലാണ് ലാല്‍ ഇപ്പോള്‍. ഗുജറാത്തിലെ കനത്ത മഴയെ തുടര്‍ന്ന് എംപുരാന്‍ ഷൂട്ടിങ് താല്‍ക്കാലികമായി നിര്‍ത്തിവെച്ചിരിക്കുകയാണ്. ചില ഫ്‌ളാഷ് ബാക്ക് സീനുകളും ഇപ്പോഴത്തെ രംഗങ്ങളും 12 ദിവസം കൊണ്ട് പൂര്‍ത്തിയാക്കാന്‍ സാധിക്കുമെന്നാണ് പ്രതീക്ഷയെന്നും ലാല്‍ പറഞ്ഞു.
