റിലീസ് ചെയ്ത് മണിക്കൂറുകള്‍ക്കകം തന്നെ ലോകമെമ്പാടുമുള്ള പ്രേക്ഷകരെ ആകര്‍ഷിക്കാന്‍ 'ദൃശ്യം 2'നായി. സിനിമ കണ്ടതിനുശേഷം മോഹന്‍ലാലിനെയും സംവിധായകന്‍ ജീത്തു ജോസഫിനും അഭിനന്ദിച്ചുകൊണ്ട് നിരവധി പ്രമുഖര്‍ രംഗത്തെത്തിയിരുന്നു. ആ കൂട്ടത്തില്‍ ഇന്ത്യന്‍ ക്രിക്കറ്റ് താരം രവിചന്ദ്രന്‍ അശ്വിന് പങ്കുവെച്ച ട്വീറ്റ് തരംഗമായി മാറിയിരുന്നു. തിരക്കുകള്‍ക്കിടയിലും 'ദൃശ്യം 2' കാണാന്‍ മനസ്സു കാണിച്ച അശ്വിന് നന്ദി അറിയിച്ചിരിക്കുകയാണ് മോഹന്‍ലാല്‍.
'താങ്കളുടെ തിരക്കുപിടിച്ച ഷെഡ്യൂളില്‍ നിന്നും ഞങ്ങളുടെ ദൃശ്യം 2 കാണാനും അതെക്കുറിച്ച് സംസാരിക്കാനും സമയം കണ്ടെത്തിയതിന് നന്ദി. ഞങ്ങളെ സംബന്ധിച്ച് ഏറെ വലുതാണ് ഇത്. കരിയറിന് എല്ലാവിധ ഭാവുകങ്ങളും അശ്വിന്'-മോഹന്‍ലാല്‍ ട്വിറ്ററില്‍ കുറിച്ചു.
ഇനി ഈ ദൃശ്യം രണ്ടിന്റെ റീമേക്കുകള്‍ വിവിധ ഭാഷകളിലേക്ക് ഒരുക്കുന്ന തിരക്കിലാണ് അണിയറ പ്രവര്‍ത്തകര്‍. അക്കൂട്ടത്തില്‍ ആദ്യം തുടങ്ങുന്നത് തെലുങ്ക് റീമേക്കാണ്. ജിത്തു ജോസഫ് സംവിധാനം ചെയ്യുന്ന ഈ ചിത്രത്തിന്റെ ഷൂട്ടിംഗ് മാര്‍ച്ചില്‍ ആരംഭിക്കും. ആന്റണി പെരുമ്പാവൂര്‍ തന്നെയാണ് റീമേക്കും നിര്‍മിക്കുന്നത്.
