ക്രിസ്‌മസ് റിലീസുകളില്‍ മഹാവിജയം നേടുകയാണ് പൃഥ്വിരാജ് ചിത്രം ‘ഡ്രൈവിംഗ് ലൈസന്‍സ്’. പൃഥ്വിക്കൊപ്പം സുരാജ് വെഞ്ഞാറമ്മൂടും തകര്‍ത്തഭിനയിച്ച സിനിമ കുടുംബപ്രേക്ഷകരെയും യുവപ്രേക്ഷകരെയും ഒരുപോലെ ആകര്‍ഷിച്ചാണ് മുന്നേറുന്നത്. ലാല്‍ ജൂനിയര്‍ സംവിധാനം ചെയ്തിരിക്കുന്ന സിനിമയുടെ തിരക്കഥ സച്ചിയാണ്.
ഒരു യൂണിവേഴ്‌സല്‍ സ്റ്റോറിലൈന്‍ ഉണ്ടെന്നതാണ് അന്യഭാഷയിലെ സിനിമാക്കാരെയും ഡ്രൈവിംഗ് ലൈസന്‍സിലേക്ക് അടുപ്പിക്കുന്നത്. തമിഴ്, തെലുങ്ക്, ഹിന്ദി റീമേക്കുകള്‍ക്കുള്ള ചര്‍ച്ചകള്‍ പുരോഗമിക്കുകയാണ്. ഓരോ ഭാഷയിലെയും സൂപ്പര്‍താരങ്ങളാണ് ചിത്രത്തിന്‍റെ റീമേക്ക് റൈറ്റിനായി സമീപിച്ചിരിക്കുന്നതെന്നതാണ് ശ്രദ്ധേയം.
ഒരു സൂപ്പര്‍താരവും അയാളുടെ ആരാധകനായ ഒരു വെഹിക്കിള്‍ ഇന്‍സ്‌പെക്ടറും തമ്മിലുള്ള ബന്ധത്തിന്‍റെ രസകരമായ ആവിഷ്‌കാരമാണ് ഡ്രൈവിംഗ് ലൈസന്‍സ്. ആദ്യം മമ്മൂട്ടിക്കായി ആലോചിച്ച ഈ കഥ പിന്നീട് പൃഥ്വിരാജിലേക്ക് എത്തുകയായിരുന്നു.
ക്രിസ്‌മസ് റിലീസുകളില്‍ ഡ്രൈവിംഗ് ലൈസന്‍സ് തന്നെയാണ് തിയേറ്ററുകളില്‍ മിന്നുന്ന വിജയം നേടുന്നത്. മഞ്‌ജു വാര്യരുടെ പ്രതി പൂവന്‍‌കോഴിയും വിജയമാണ്.
