സുരേഷ് ഗോപി ആരാധകര്‍ക്ക് ഒരുപാട് പ്രതീക്ഷകള്‍ നല്‍കുന്ന വര്‍ഷമാണ് 2023. തങ്ങളുടെ പ്രിയ താരത്തിന്റെ പഴയ സിനിമകള്‍ക്ക് രണ്ടാം ഭാഗം വരുന്നു. 'ചിന്താമണി കൊലക്കേസി'ന്റെ തുടര്‍ച്ച ചിത്രം ആരംഭിക്കുകയായി.
എ കെ സാജന്‍ തിരക്കഥയെഴുതുന്ന ചിന്താമണി കൊലക്കേസിന്റെ രണ്ടാം ഭാഗത്തെക്കുറിച്ചുള്ള സൂചനകള്‍ കഴിഞ്ഞദിവസം സംവിധായകന്‍ ഷാജി കൈലാസ് നല്‍കിയിരുന്നു. പുതിയ പോസ്റ്റര്‍ സംവിധായകന്‍ പുറത്തിറക്കി.
സമ്മര്‍ ഇന്‍ ബത്‌ലഹേം
എത്ര കണ്ടാലും മതിവരാത്ത സിബി മലയില്‍ ചിത്രമായ 'സമ്മര്‍ ഇന്‍ ബത്‌ലഹേം' റിലീസ് ആയിട്ട് 23 വര്‍ഷങ്ങള്‍ പിന്നിടുന്നു. സിനിമയ്ക്ക് രണ്ടാം ഭാഗം വരുന്നു .സുരേഷ് ഗോപിയുടെ ഡെന്നിസിന്റെ ഫാമിലേക്ക് അവധിക്കാലം ആഘോഷിക്കാനായി എത്തുന്ന മുത്തശ്ശനും മുത്തശ്ശിയും കുട്ടികളും ഓരോ തവണ കാണുമ്പോഴും പുത്തന്‍ അനുഭവങ്ങളാണ് കാഴ്ചക്കാരന് സമ്മാനിക്കുന്നത്.വരാനിരിക്കുന്ന ചിത്രം പ്രീക്വലിന്റെ തുടര്‍ച്ചയാകില്ല.സുരേഷ് ഗോപി, ജയറാം, മഞ്ജു വാര്യര്‍, കലാഭവന്‍ മണി എന്നിവര്‍ അഭിനയിച്ച ചിത്രം 1998 ല്‍ പുറത്തിറങ്ങി.
ഹൈവേ 2
സംവിധായകന്‍ ജയരാജും സൂപ്പര്‍ സ്റ്റാര്‍ സുരേഷ് ഗോപിയും 1995ല്‍ പുറത്തിറങ്ങിയ 'ഹൈവേ'യുടെ രണ്ടാം ഭാഗത്തിനായി വീണ്ടും ഒന്നിക്കുന്നു. 'ഹൈവേ 2' എന്നാണ് തുടര്‍ ചിത്രത്തിന് പേരിട്ടിരിക്കുന്നത്. സുരേഷ് ഗോപിയുടെ 254-ാമത്തെ പ്രൊജക്റ്റ് കൂടിയാണ്. ചിത്രീകരണം വൈകാതെ ആരംഭിക്കും എന്നാണ് വിവരം.
