'എല്ലാത്തിനെയും നേരിട്ടല്ലേ പറ്റൂ'; മകള്‍ മരിച്ച് പത്താം നാള്‍ സിനിമ പ്രമോഷന് എത്തി വിജയ് ആന്റണി

മകള്‍ നഷ്ടപ്പെട്ട വേദന ഉള്ളില്‍ ഒതുക്കി പുതിയ സിനിമയുടെ പ്രമോഷനില്‍ പങ്കെടുത്ത് നടന്‍ വിജയ് ആന്റണി.'രത്തം'ചിത്രത്തിന്റെ പ്രചാരണത്തിന് വേണ്ടിയാണ് അദ്ദേഹം എത്തിയത്. വിജയ് ആന്റണിക്ക് കൂട്ടായി രണ്ടാമത്തെ മകളുമെത്തിയിരുന്നു. തന്റെ സ്വകാര്യ കാര്യങ്ങള്‍ ഒന്നും അധികം നടന്‍ സംസാരിച്ചില്ല. 

പ്രൊഫഷണലിസത്തിന്റെ യഥാര്‍ത്ഥ ഉദാഹരണമാണ് വിജയ് ആന്റണിയെന്ന് നിര്‍മ്മാതാവ് ധനഞ്ജയന്‍ വിജയ് ആന്റണിയുടെ ചിത്രങ്ങള്‍ പങ്കുവെച്ചുകൊണ്ട് എഴുതി.

10 ദിവസങ്ങള്‍ക്ക് മുമ്പ് സെപ്റ്റംബര്‍ 19ന് ആയിരുന്നു നടനും സംഗീത സംവിധായകനുമായ വിജയ് ആന്റണിയുടെ മകള്‍ മീര ആത്മഹത്യ ചെയ്തത്. പ്ലസ് ടു വിദ്യാര്‍ഥിയായിരുന്നു മീര.

 വിജയ് ആന്റണി ചിത്രം 'രത്തം' ആദ്യം സെപ്റ്റംബര്‍ 28 ന് തിയറ്ററുകളില്‍ എത്തിക്കാന്‍ ഉള്ള ശ്രമങ്ങള്‍ നടക്കുമ്പോള്‍ ആയിരുന്നു, നടന്റെ മകളുടെ മരണം. പിന്നീട് ഒക്ടോബര്‍ ആറിന് റിലീസ് മാറ്റുകയായിരുന്നു.

വിജയ് ആന്റണി, മഹിമ നമ്പ്യാര്‍, നന്ദിത ശ്വേത, രമ്യ നമ്പീശന്‍, നിഴല്‍ഗള്‍ രവി, ജഗന്‍ തുടങ്ങിയവര്‍ പ്രധാന വേഷങ്ങളില്‍ എത്തുന്ന ചിത്രം സംവിധാനം ചെയ്തിരിക്കുന്നത് സി എസ് അമുദന്‍ ആണ്.