രോഹിത് ശര്‍മ വളരെ കുറച്ച് സംസാരിക്കുന്ന ശാന്തപ്രകൃതിയായ ആള്‍ ആണ്. ബാറ്റ് ചെയ്യുമ്പോഴുള്ള സ്ഫോടനാത്മകതയൊന്നും സംസാരത്തിലും പെരുമാറ്റത്തിലും ഉണ്ടാകാറില്ല. അത്രയും കൂള്‍ ആയ രോഹിത്തിന്‍റെ പോലും കണ്‍‌ട്രോള്‍ പോകുന്ന ഒരു സംഭവം കഴിഞ്ഞ ദിവസം ഉണ്ടായി.
ദക്ഷിണാഫ്രിക്കയ്ക്കെതിരെ ബാംഗ്ലൂര്‍ ചിന്നസ്വാമി സ്റ്റേഡിയത്തില്‍ മൂന്നാം ട്വന്റി20 മത്സരം നടക്കുന്ന സമയം. പേസ് ബൌളര്‍ നവ്‌ദീപ് സെയ്‌നിയാണ് രോഹിത് ശര്‍മയുടെ നാവിന്‍റെ ചൂടറിഞ്ഞത്. പന്ത്രണ്ടാം ഓവറില്‍ ദക്ഷിണാഫ്രിക്കന്‍ ബാറ്റ്സ്മാന്‍ തെംബ ബാവുമയ്ക്കെതിരെ അലക്‍ഷ്യമായി പന്തെറിഞ്ഞതിനാണ് സെയ്‌നിയെ രോഹിത് ശര്‍മ പരസ്യമായി ശകാരിച്ചത്.
സെയ്നിയുടെ പന്തുകളില്‍ തുടര്‍ച്ചയായി ബൌണ്ടറികള്‍ പാഞ്ഞിട്ടും വീണ്ടും ലെഗ് സൈഡില്‍ ഫുള്‍ ടോസ് എറിയുന്നത് കണ്ട് നിയന്ത്രണം വിട്ട രോഹിത് ശര്‍മ്മ ‘അല്‍പ്പം ബുദ്ധി ഉപയോഗിക്കൂ’ എന്ന് ആംഗ്യത്തിലൂടെ സെയ്നിയോട് പറയുകയായിരുന്നു. ഇത് കണ്ട് പരിഭ്രാന്തനായ നവ്‌ദീപ് സെയ്‌നി പിന്നീട് തന്‍റെ ബൌളിംഗില്‍ നിയന്ത്രണം കൊണ്ടുവരികയും ചെയ്തു.
സെയ്‌നിക്കെതിരെ പൊട്ടിത്തെറിക്കുന്ന രോഹിത് ശര്‍മയുടെ ദൃശ്യങ്ങള്‍ ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുകയാണ്. രണ്ട് ഓവറുകളില്‍ 25 റണ്‍സാണ് നവ്‌ദീപ് സെയ്‌നി വിട്ടുകൊടുത്തത്. മത്സരം ദക്ഷിണാഫ്രിക്ക ജയിക്കുകയും ചെയ്തു.
