എപ്പോഴും ശ്രമിക്കുന്നത് അദ്ദേഹത്തെ പോലെ കളിക്കാൻ, പ്രചോദനമായ താരത്തെപറ്റി ഹാർദ്ദിക് പാണ്ഡ്യ

ഓസ്ട്രേലിയക്കെതിരായ ഏകദിന പരമ്പരയിലും തുടർന്ന് നടന്നുകൊണ്ടിരിക്കുന്ന ടി20 മത്സരങ്ങളിലും മികച്ച പ്രകടനമാണ് ഇന്ത്യൻ ഓൾറൗണ്ടർ ഹാർദ്ദിക് പാണ്ഡ്യ നടത്തുന്നത്. ഏകദിനമത്സരങ്ങളിൽ ഒരറ്റത്ത് ഉറച്ചു നിൽക്കുന്ന പ്രകടനവും അടിച്ചു തകർക്കുന്ന പ്രകടനവും നടത്തി ടീമിന്റെ ആവശ്യങ്ങൾക്കനുസരിച്ച് കളിക്കാൻ തനിക്കാവുമെന്ന് പാണ്ഡ്യ തെളിയിച്ചു. തന്റെ ആവശ്യം അറിഞ്ഞ് ടി20യിലും മികച്ച പ്രകടനം കാഴ്‌ച്ചവെച്ചിരിക്കുകയാണ് താരം. ഇപ്പോളിതാ ക്രിക്കറ്റിൽ തനിക്ക് പ്രചോദനമായ താരം ആരെന്ന് വ്യക്തമാക്കിയിരിക്കുകയാണ് ഹാർദ്ദിക്.

വെസ്റ്റിൻഡീസ് നായകനായ കിറോൺ പൊള്ളാർഡാണ് തന്റെ മാതൃകയെന്നാണ് താരം പറയുന്നത്. അദ്ദേഹത്തിന്റെ പ്രകടനം അടുത്ത് നിന്ന് കാണാനുള്ള ഭാഗ്യം തനിക്ക് ലഭിച്ചിട്ടുണ്ടെന്നും പൊള്ളാർഡ് ഒരു പ്രചോദനമാണെന്നും പാണ്ഡ്യ പറഞ്ഞു. ഐപിഎല്ലിൽ നന്നായി തന്നെ ബാറ്റ് ചെയ്യുകയുണ്ടായി. ലോക്ക്‌ഡൗൺ സമയത്ത് എങ്ങനെ മത്സരം നന്നായി ഫിനിഷ് ചെയ്യുക എന്നതിനെ പറ്റിയാണ് പ്ലാൻ ചെയ്‌തിരുന്നതെന്നും പാണ്ഡ്യ പറഞ്ഞു. മുമ്പും ഇത്തരത്തിൽ കളിച്ചിട്ടുണ്ടെങ്കിലും ഇപ്പോൾ തന്റെ പ്രകടനം കൂടുതൽ ശ്രദ്ധിക്കപ്പെടുന്നുണ്ടെന്നും താരം പറഞ്ഞു