അവിടെയും തോല്‍വി ഇവിടെയും തോല്‍വി..! ഇന്ത്യന്‍ വനിതകള്‍ക്ക് മുന്നിലും പാക്കിസ്ഥാന്‍ വീണു; ഏഷ്യാ കപ്പില്‍ മിന്നുന്ന തുടക്കം
ഓപ്പണര്‍മാരായ ഷഫാലി വര്‍മ (29 പന്തില്‍ 40), സ്മൃതി മന്ദാന (31 പന്തില്‍ 45) എന്നിവര്‍ ഇന്ത്യക്ക് മികച്ച തുടക്കമാണ് നല്‍കിയത്
വനിതകളുടെ ഏഷ്യാ കപ്പ് പോരാട്ടത്തില്‍ പാക്കിസ്ഥാനെ തോല്‍പ്പിച്ച് ഇന്ത്യ. ഏഴ് വിക്കറ്റിനാണ് ഇന്ത്യന്‍ വനിതകളുടെ ജയം. ഒരു ഘട്ടത്തില്‍ പോലും ഇന്ത്യക്ക് ഭീഷണിയാകാന്‍ പാക്കിസ്ഥാന്‍ വനിത ടീമിനു സാധിച്ചില്ല. ആദ്യം ബാറ്റ് ചെയ്ത പാക്കിസ്ഥാന്‍ വനിത ടീം 19.2 ഓവറില്‍ 108 റണ്‍സിന് ഓള്‍ഔട്ടായി. മറുപടി ബാറ്റിങ്ങില്‍ 14.1 ഓവറില്‍ മൂന്ന് വിക്കറ്റ് നഷ്ടത്തില്‍ ഇന്ത്യ ലക്ഷ്യം കണ്ടു.
ഓപ്പണര്‍മാരായ ഷഫാലി വര്‍മ (29 പന്തില്‍ 40), സ്മൃതി മന്ദാന (31 പന്തില്‍ 45) എന്നിവര്‍ ഇന്ത്യക്ക് മികച്ച തുടക്കമാണ് നല്‍കിയത്. ഓപ്പണര്‍മാരുടെ വിക്കറ്റുകള്‍ നഷ്ടമാകുമ്പോള്‍ തന്നെ ഇന്ത്യ ഏറെക്കുറെ വിജയിച്ചിരുന്നു. ദയാലന്‍ ഹേമലത 11 പന്തില്‍ 14 റണ്‍സ് നേടി. ക്യാപ്റ്റന്‍ ഹര്‍മന്‍പ്രീത് കൗര്‍ (11 പന്തില്‍ അഞ്ച്), ജെമിമ റോഡ്രിഗസ് (മൂന്ന് പന്തില്‍ മൂന്ന്) എന്നിവര്‍ പുറത്താകാതെ നിന്നു.
നാല് ഓവറില്‍ 20 റണ്‍സ് മാത്രം വഴങ്ങി മൂന്ന് വിക്കറ്റ് വീഴ്ത്തിയ ഇന്ത്യയുടെ ദീപ്തി ശര്‍മയാണ് കളിയിലെ താരം. രേണുക സിങ്, പൂജ വസ്ത്രാകര്‍, ശ്രേയങ്ക പട്ടീല്‍ എന്നിവര്‍ക്ക് രണ്ട് വീതം വിക്കറ്റുകള്‍.
