ഇംഗ്ലണ്ട് വനിതകള്‍ക്കെതിരായ ടി20 പരമ്പരയിലെ ആദ്യ മത്സരത്തില്‍ 97 റണ്‍സിന്റെ വമ്പന്‍ വിജയം സ്വന്തമാക്കി ഇന്ത്യന്‍ വനിതകള്‍. മത്സരത്തില്‍ ആദ്യം ബാറ്റ് ചെയ്ത ഇന്ത്യ സ്മൃതി മന്ദാനയുടെ തകര്‍പ്പന്‍ സെഞ്ചുറി പ്രകടനത്തിന്റെ ബലത്തില്‍ 211 റണ്‍സാണ് നേടിയത്. 62 പന്തില്‍ 112 റണ്‍സുമായി സ്മൃതി മന്ദാനയാണ് ഇന്ത്യയെ കൂറ്റന്‍ സ്‌കോറിലെത്തിച്ചത്. മറുപടി ബാറ്റിങ്ങിനിറങ്ങിയ ഇംഗ്ലണ്ട് ഇന്നിങ്ങ്‌സ് 14.5 ഓവറില്‍ 113 റണ്‍സിന് അവസാനിച്ചു. നാല് വിക്കറ്റുകളുമായി തിളങ്ങിയ ശ്രീ ചരണിയാണ് ഇംഗ്ലണ്ട് ബാറ്റിംഗ് നിരയെ തകര്‍ത്തത്.
66 റണ്‍സെടുത്ത ഇംഗ്ലണ്ട് ക്യാപ്റ്റന്‍ നതാലി സ്‌കിവര്‍ ബ്രന്റ് മാത്രമാണ് ഇംഗ്ലണ്ട് നിലയില്‍ തിളങ്ങിയത്. സോഫിയ ഡങ്ക്‌ലി, ഡാനിയേല വ്യാട്ട്, ആലീസ് ക്യാപ്‌സി, സോഫി എക്ലെസ്റ്റോണ്‍ തുടങ്ങിയ താരങ്ങളെല്ലാം ഇംഗ്ലണ്ട് നിരയില്‍ നിരാശപ്പെടുത്തി. ചരണിക്ക് പുറമെ ദീപ്തി ശര്‍മ, രാധ യാദവ് എന്നിവര്‍ രണ്ട് വിക്കറ്റ് വീതം വീഴ്ത്തി. അമന്‍ജോത് കൗര്‍, അരുന്ധതി റെഡ്ഡി എന്നിവര്‍ ഓരോ വിക്കറ്റും നേടി.
നേരത്തെ ആദ്യം ബാറ്റ് ചെയ്ത ഇന്ത്യയ്ക്ക് മികച്ച തുടക്കമാണ് ഷെഫാലി വര്‍മയും സ്മൃതി മന്ദാനയും ചേര്‍ന്ന് നല്‍കിയത്. 23 പന്തില്‍ 43 റണ്‍സുമായി ഹാര്‍ലീന്‍ ഡിയോളും സ്മൃതിക്ക് മികച്ച പിന്തുണ നല്‍കി. 62 പന്തില്‍ 3 സിക്‌സറും 15 ഫോറും അടങ്ങിയതാണ് സ്മൃതിയുടെ ഇന്നിങ്ങ്‌സ്. ഇംഗ്ലണ്ടിനായി ലോറല്‍ ബെല്‍ മൂന്ന് വിക്കറ്റ് വീഴ്ത്തി.
