ജൂലൈ 2ന് ആരംഭിക്കുന്ന എഡ്ജ്ബാസ്റ്റണ്‍ ടെസ്റ്റില്‍ ഇന്ത്യന്‍ ഇതിഹാസ താരം സുനില്‍ ഗവാസ്‌കറുടെ റെക്കോര്‍ഡ് നേട്ടം മറികടക്കാനൊരുങ്ങി ഇന്ത്യന്‍ യുവ ഓപ്പണര്‍ യശ്വസി ജയ്‌സ്വാള്‍. 2023 ജൂലൈയില്‍ ടെസ്റ്റില്‍ അരങ്ങേറ്റം കുറിച്ച ജയ്‌സ്വാള്‍ 20 ടെസ്റ്റ് മത്സരങ്ങളില്‍ നിന്നും 1903 റണ്‍സാണ് ഇതിനകം നേടിയത്. ഇംഗ്ലണ്ടിനെതിരായ രണ്ടാം ക്രിക്കറ്റ് ടെസ്റ്റില്‍ 97 റണ്‍സ് കൂടെ നേടാനായാല്‍ ടെസ്റ്റ് ക്രിക്കറ്റില്‍ 2000 റണ്‍സ് എന്ന നേട്ടം ജയ്സ്വാളിന് സ്വന്തമാക്കാനാകും. ഇതോടെ അതിവേഗത്തില്‍ 2000 ടെസ്റ്റ് റണ്‍സ് എന്ന നേട്ടമാകും ജയ്‌സ്വാള്‍ സ്വന്തമാക്കുക.
1976ല്‍ തന്റെ 23മത്തെ ടെസ്റ്റിലായിരുന്നു ഗവാസ്‌കര്‍ ഈ നേട്ടത്തിലെത്തിയത്. എന്നാല്‍ തന്റെ 21മത്തെ ടെസ്റ്റ് മത്സരമാണ് എഡ്ജ്ബാസ്റ്റണില്‍ ജയ്‌സ്വാള്‍ കളിക്കുന്നത്.38 ഇന്നിങ്ങ്‌സുകളില്‍ നിന്നാണ് ജയ്‌സ്വാള്‍ 1903 റണ്‍സ് അടിച്ചെടുത്തത്. അടുത്ത ടെസ്റ്റിലെ ആദ്യ ഇന്നിങ്ങ്‌സില്‍ തന്നെ 97 റണ്‍സടിക്കാന്‍ സാധിച്ചാല്‍ 40 ഇന്നിങ്ങ്‌സുകളില്‍ നിന്നും 2000 റണ്‍സെന്ന രാഹുല്‍ ദ്രാവിഡിന്റെയും വിരേന്ദര്‍ സെവാഗിന്റെയും പേരിലുള്ള ഇന്ത്യന്‍ റെക്കോര്‍ഡും താരത്തിന്റെ പേരിലാകും.
ഇംഗ്ലണ്ടിനെതിരെ മികച്ച റെക്കോര്‍ഡുള്ള താരം 817 ടെസ്റ്റ് റണ്‍സ് ഇതിനകം ഇംഗ്ലണ്ടിനെതിരെ നേടിയിട്ടുണ്ട്. രണ്ടാം ടെസ്റ്റില്‍ മികച്ച പ്രകടനം നടത്തിയാല്‍ ലോക ടെസ്റ്റ് ചാമ്പ്യന്‍ഷിപ്പില്‍ അതിവേഗം 2000 റണ്‍സ് നേടുന്ന താരമെന്ന റെക്കോര്‍ഡ് നേട്ടവും ജയ്‌സ്വാളിന്റെ പേരിലാകും. 40 ഇന്നിങ്ങ്‌സില്‍ 2000 റണ്‍സ് നേടിയ മുന്‍ ഇന്ത്യന്‍ താരം രോഹിത് ശര്‍മയുടെ റെക്കോര്‍ഡാകും താരം മറികടക്കുക. ലോക ടെസ്റ്റ് ചാമ്പ്യന്‍ഷിപ്പില്‍ അതിവേഗം 2000 റണ്‍സ് എന്ന നേട്ടം നിലവില്‍ ഓസീസ് താരമായ മാര്‍നസ് ലബുഷെയ്‌നിന്റെ പേരിലാണ്. 31 ഇന്നിങ്ങ്‌സുകളിലായിരുന്നു താരത്തിന്റെ നേട്ടം.
