ഇംഗ്ലണ്ടിനെതിരെ സൂര്യകുമാര്‍ അധികം റണ്‍സൊന്നും എടുക്കില്ല: മൈക്ക് ഹസി
സൂര്യ ഫോമിലെത്തിയാല്‍ മികച്ച സ്‌കോര്‍ സ്വന്തമാക്കാമെന്ന പ്രതീക്ഷയിലാണ് ടീം ഇന്ത്യ
ട്വന്റി 20 ലോകകപ്പ് സെമി ഫൈനലില്‍ കരുത്തരായ ഇംഗ്ലണ്ടിനെ നേരിടാന്‍ ഇന്ത്യ ഒരുങ്ങിക്കഴിഞ്ഞു. വ്യാഴാഴ്ച ഉച്ചയ്ക്ക് 1.30 മുതലാണ് മത്സരം ആരംഭിക്കുക. മത്സരത്തിന്റെ ടിക്കറ്റുകള്‍ ഇതിനോടകം തന്നെ വിറ്റു തീര്‍ന്നു. മികച്ച ഫോമിലുള്ള സൂര്യകുമാര്‍ യാദവാണ് ഇന്ത്യയുടെ തുറുപ്പുചീട്ട്. സൂര്യ ഫോമിലെത്തിയാല്‍ മികച്ച സ്‌കോര്‍ സ്വന്തമാക്കാമെന്ന പ്രതീക്ഷയിലാണ് ടീം ഇന്ത്യ. ഇംഗ്ലണ്ട് ഏറെ പേടിയോടെ കാണുന്ന താരവും സൂര്യകുമാര്‍ തന്നെ. അതേസമയം, ഇംഗ്ലണ്ടിനെതിരെ സൂര്യകുമാര്‍ അധികം റണ്‍സൊന്നും എടുക്കില്ലെന്നാണ് ഇംഗ്ലണ്ട് ടീമിന്റെ സഹപരിശീലകന്‍ മൈക്ക് ഹസി പറയുന്നത്. സ്‌പോര്‍ട്‌സ് സ്റ്റാറിനോട് സംസാരിക്കുകയായിരുന്നു അദ്ദേഹം.
' കഴിഞ്ഞ കുറച്ച് നാളുകളായി ഏറെ സെന്‍സേഷണല്‍ ആയിട്ടുള്ള താരമാണ് സൂര്യ. ഐപിഎല്ലില്‍ ഏതാനും വര്‍ഷങ്ങളായി അദ്ദേഹം ഇത് ചെയ്യുന്നു. സ്ഥിരതയോടു കൂടി അദ്ദേഹം ബാറ്റ് ചെയ്യുന്നു. അത് കാണാന്‍ തന്നെ പ്രധാനപ്പെട്ട കാഴ്ചയാണ്. വ്യക്തിപരമായി അദ്ദേഹത്തിന്റെ ബാറ്റിങ് ഞാന്‍ ഏറെ ഇഷ്ടപ്പെടുന്നു. എന്നാല്‍ ഇംഗ്ലണ്ടിനെതിരെ സൂര്യകുമാര്‍ അധികം റണ്‍സൊന്നും എടുക്കില്ലെന്ന് ഞാന്‍ ആത്മാര്‍ത്ഥമായി ആഗ്രഹിക്കുന്നു. എന്തൊക്കെയായാലും ഈ ടൂര്‍ണമെന്റിലെ മികച്ച ടീമുകളില്‍ ഒന്നാണ് ഇന്ത്യ,' ഹസി പറഞ്ഞു.
