കുട്ടി ക്രിക്കറ്റിലും തിളങ്ങണം, വീണ്ടും ഐപിഎൽ കളിക്കാൻ ആഗ്രഹം പ്രകടിപ്പിച്ച് സ്റ്റീവ് സ്മിത്ത്

ഇന്ത്യന്‍ പ്രീമിയര്‍ ലീഗില്‍ തിരിച്ചെത്താനുള്ള ആഗ്രഹം പ്രകടിപ്പിച്ച് ഓസീസ് താരം സ്റ്റീവ് സ്മിത്ത്. മേജര്‍ ക്രിക്കറ്റ് ലീഗിലെ വെടിക്കെട്ട് പ്രകടനത്തിന് ശേഷമാണ് ഐപിഎല്‍ കളിക്കാനുള്ള ആഗ്രഹം താരം തുറന്ന് പറഞ്ഞത്. ടി20യ്ക്ക് ചേര്‍ന്ന താരമല്ലെന്ന രീതിയില്‍ ആരാധകര്‍ ഒഴിവാക്കിയ സ്റ്റീവ് സ്മിത്ത് ടി20 ക്രിക്കറ്റില്‍ അടുത്തിടെയായി മികച്ച പ്രകടനങ്ങളാണ് നടത്തുന്നത്.

മേജര്‍ ക്രിക്കറ്റ് ലീഗ് ഫൈനലില്‍ വാഷിങ്ങ്ടണ്‍ ഫ്രീഡത്തിനായി 52 പന്തില്‍ 88 റണ്‍സുമായി സ്മിത്ത് തിളങ്ങിയിരുന്നു. പാറ്റ് കമ്മിന്‍സും ഹാരിസ് റൗഫും അടങ്ങുന്ന പേസ് നിരയെയാണ് സ്മിത്ത് അടിച്ച് പറത്തിയത്. ഇതിന് പിന്നാലെയാണ് ഐപിഎല്ലില്‍ തിരിച്ചെത്താന്‍ ആഗ്രഹമുള്ളതായി സ്മിത്ത് പറഞ്ഞത്. കഴിഞ്ഞ 2 താരലേലത്തിലും സ്മിത്തിന്റെ പേരുണ്ടായിരുന്നെങ്കിലും താരത്തെ വാങ്ങിക്കാന്‍ ടീമുകള്‍ താത്പര്യം കാണിച്ചിരുന്നില്ല. 35 വയസ് പിന്നിട്ട താരം നിലവില്‍ ഓസ്‌ട്രേലിയയുടെ ടെസ്റ്റ് ടീമില്‍ മാത്രമാണ് കളിക്കുന്നത്.