സോഷ്യല്‍ മീഡിയയില്‍ ചര്‍ച്ചാവിഷയമായി വിരാട് കോലിയുടെ പുതിയ സോഷ്യല്‍ മീഡിയ പോസ്റ്റ്. ടെസ്റ്റ് ചാംപ്യന്‍ഷിപ്പ് ഫൈനലില്‍ ഓസ്‌ട്രേലിയയോട് തോറ്റതിനു പിന്നാലെയാണ് കോലിയുടെ പോസ്റ്റ്. ചൈനീസ് എഴുത്തുകാരന്‍ ലവോ സുവിന്റെ വാക്കുകളാണ് കോലി പങ്കുവെച്ചത്. ' മഹത്തായ ശക്തിയുടെ ഉറവിടമാണ് നിശബ്ദത' എന്നാണ് ആ വരികള്‍.
ഇന്ത്യന്‍ നായകന്‍ രോഹിത് ശര്‍മ, പരിശീലകന്‍ രാഹുല്‍ ദ്രാവിഡ് എന്നിവരുമായി കോലി അഭിപ്രായ ഭിന്നതയിലാണെന്നാണ് ഈ പോസ്റ്റിനു പിന്നാലെ ആരാധകരുടെ കണ്ടെത്തല്‍. തന്റെ അഭിപ്രായങ്ങള്‍ക്ക് ടീമില്‍ യാതൊരു സ്ഥാനവും ലഭിക്കുന്നില്ലെന്ന് കോലിക്ക് തോന്നിക്കാണും. അതുകൊണ്ടാണ് താരം മത്സരശേഷം ഇങ്ങനെയൊരു പോസ്റ്റ് ഇട്ടതെന്നും ആരാധകര്‍ പറയുന്നു.
ടെസ്റ്റ് ചാംപ്യന്‍ഷിപ്പ് ഫൈനലിനുള്ള ടീം സെലക്ഷനിലും മാനേജ്‌മെന്റിന്റെ മറ്റ് ചില തീരുമാനങ്ങളിലും കോലിക്ക് അതൃപ്തിയുണ്ടെന്നാണ് വിവരം. ടോസ് ലഭിച്ചിട്ടും ഓസ്‌ട്രേലിയയെ ആദ്യം ബാറ്റിങ്ങിനയച്ചതും പ്ലേയിങ് ഇലവനില്‍ രവിചന്ദ്രന്‍ അശ്വിനെ ഉള്‍പ്പെടുത്താത്തതും കോലിയെ അതൃപ്തനാക്കിയിട്ടുണ്ടെന്നാണ് ആരാധകര്‍ പറയുന്നത്.
ടെസ്റ്റ് ചാംപ്യന്‍ഷിപ്പ് ഫൈനലില്‍ രണ്ട് ഇന്നിങ്‌സുകളിലുമായി 63 റണ്‍സ് മാത്രമാണ് കോലി നേടിയത്.
