Virat Kohli, Ranji Trophy: 'രഞ്ജിയില്‍ ആണ് കുറ്റി തെറിച്ചു പോകുന്നത്'; നിരാശപ്പെടുത്തി കോലി, ആറ് റണ്‍സിനു പുറത്ത് (വീഡിയോ)
കോലിയുടെ ഫോം ഔട്ട് വ്യക്തമാകുന്ന തരത്തിലായിരുന്നു രഞ്ജിയിലെ വിക്കറ്റ്
Virat Kohli's Wicket in Ranji
Virat Kohli, Ranji Trophy: രഞ്ജി ട്രോഫിയിലും നിരാശപ്പെടുത്തി വിരാട് കോലി. ഡല്‍ഹിക്കു വേണ്ടി കളത്തിലിറങ്ങിയ കോലി ആറ് റണ്‍സെടുത്ത് പുറത്തായി. 15 പന്തില്‍ ഒരു ഫോര്‍ സഹിതം ആറ് റണ്‍സെടുത്ത ഇന്ത്യ താരത്തെ റെയില്‍വെയ്‌സ് താരം ഹിമാന്‍ഷു സാങ്വാന്‍ ആണ് പുറത്താക്കിയത്.
കോലിയുടെ ഫോം ഔട്ട് വ്യക്തമാകുന്ന തരത്തിലായിരുന്നു രഞ്ജിയിലെ വിക്കറ്റ്. ബാറ്റിനും പാഡിനും ഇടയിലൂടെ കടന്നുപോയ പന്ത് ഓഫ് സ്റ്റംപ് തെറിപ്പിക്കുകയായിരുന്നു. സാങ്വാന്റെ ബോളിനു മുന്നില്‍ അക്ഷരാര്‍ത്ഥത്തില്‍ കോലി എന്തുചെയ്യണമെന്ന് അറിയാതെ പകച്ചുപോയി. ഏറെ നിരാശനായാണ് താരം കളം വിട്ടത്. കോലിയുടെ വിക്കറ്റെടുത്ത സാങ്വാന്‍ വലിയ ആഘോഷപ്രകടനവും നടത്തി. വീഡിയോ സോഷ്യല്‍ മീഡിയയില്‍ ചര്‍ച്ചയായിട്ടുണ്ട്.
അതേസമയം കോലി പുറത്തായതോടെ അരുണ്‍ ജയ്റ്റ്‌ലി സ്റ്റേഡിയവും കാലിയായി. കോലിയുടെ കളി കാണാനെത്തിയവര്‍ താരം ഔട്ടായതിനു പിന്നാലെ ഗ്രൗണ്ട് വിട്ടു. ഡല്‍ഹി ഒന്നാം ഇന്നിങ്‌സില്‍ 32 ഓവറില്‍ നാല് വിക്കറ്റ് നഷ്ടത്തില്‍ 110 റണ്‍സ് എന്ന നിലയിലാണ്. റെയില്‍വെയ്‌സിന്റെ സ്‌കോറില്‍ നിന്ന് 131 റണ്‍സ് അകലെയാണ് ഇപ്പോഴും. റെയില്‍വെയ്‌സ് ഒന്നാം ഇന്നിങ്‌സില്‍ 241 റണ്‍സ് എടുത്തിട്ടുണ്ട്.
12 വര്‍ഷങ്ങള്‍ക്കു ശേഷമാണ് കോലി വീണ്ടും രഞ്ജി കളിക്കുന്നത്. അതുകൊണ്ട് തന്നെ അരുണ്‍ ജയ്റ്റ്‌ലി സ്‌റ്റേഡിയത്തില്‍ കളി കാണാന്‍ വന്‍ ജനക്കൂട്ടം ഉണ്ടായിരുന്നു. ഇന്നലെ മാത്രം 15,000 ത്തില്‍ അധികം ആളുകളാണ് കളി കാണാന്‍ എത്തിയത്. കോലി ബാറ്റിങ്ങിനു ഇറങ്ങാനുള്ള സാധ്യത മുന്നില്‍കണ്ട് ഇന്നു രാവിലെയും വലിയ തിരക്കാണ് സ്‌റ്റേഡിയത്തില്‍ അനുഭവപ്പെട്ടത്.
