ഡൽഹി: പ്രായപൂർത്തിയാവാത്ത പെൺകുട്ടികളെ തട്ടിക്കൊണ്ടുപോയി സ്വന്തം വീട്ടിൽ പാർപ്പിച്ച് 40കാരൻ. ഡൽഹിയിലാണ് സംഭവം ഉണ്ടായത്. കൃഷണ ദത്ത് തിവരി എന്നയാൾ സംഭവത്തിൽ പൊലീസിന്റെ പിടിയിലായി. രണ്ട് പെൺകുട്ടികളെ തട്ടിക്കൊണ്ടുവന്ന് ഇയാൾ സ്വന്തം വീട്ടിൽ പാർപ്പിക്കുകയായിരുന്നു.
എന്നാൽ തട്ടിക്കൊണ്ടൊപോയതിന് പിന്നിലെ കാരണം കേട്ട് പൊലീസ് ഞെട്ടി. തിവാരിക്ക് 12ഉം 14ഉം വയസുള്ള ആൺകുട്ടികളാണുള്ളത്. പെൺ‌മക്കൾ വേണം എന്ന ആഗ്രഹം കാരണമാണ് പെൺകുട്ടികളെ തട്ടിക്കൊണ്ട് വന്ന് വീട്ടിൽ പാർപ്പിച്ചത് എന്ന് തിവാരി പൊലീസിൽ മൊഴി നൽകി.
എട്ടുവയസുകാരിയെ കാണാതായി എന്ന പരാതിയിൽ പൊലീസ് നടത്തിയ അന്വേഷണത്തിലാണ് തിവാരി പിടിയിലാകുന്നത്. കാണാതായ പെൺകുട്ടി അടുത്ത ദിവസം സുരക്ഷിതമായി വീട്ടിലെത്തിയിരുന്നു. പെൺകുട്ടിയെ തിവാരി തിരികെ കൊണ്ടുവന്ന് വിടുന്നതിന്റെ സി സി ടി വി ദൃശ്യങ്ങൾ പൊലീസിന് ലഭിച്ചു. പബ്ലിക് ടോയ്‌ലെറ്റിൽ വച്ച് ഒരാൾ തട്ടിക്കൊണ്ടുപോവുകയായിരുന്നു എന്ന് പെൺകുട്ടി പൊലീസിൽ മൊഴി നൽകിയിരുന്നു.
മുൻപ് മറ്റൊരു പെൺകുട്ടിയെയും തട്ടിക്കൊണ്ടുപോയി വീട്ടിൽ പാർപ്പിച്ചിരുന്നു എന്ന് തിവാരി സമ്മതിച്ചിട്ടുണ്ട്. എന്നാൽ കുട്ടികളെ താൻ ഒരു തരത്തിലും ഉപദ്രവിക്കില്ലെന്നും പെൺകുട്ടികൾ വേണമെന്ന ആഗ്രഹംകൊണ്ടാണ് അങ്ങനെ ചെയ്തതെന്നുമാണ് ഇയാൾ ആവർത്തിച്ച് പറയുന്നത്. തട്ടികൊണ്ടുപോകലിനു പിന്നിൽ ദുരുദ്ദേശങ്ങൾ ഉണ്ടായിരുന്നില്ല എന്നാണ് പൊലീസിന്റെ അന്വേഷണത്തിലും കണ്ടെത്തിയിരിക്കുന്നത്.
