പിതാവിന്റെ അവിഹിത ബന്ധം പുറത്തറിയുമെന്ന ഭയം; കുട്ടികളെ ബന്ധു വെടിവച്ചുകൊന്നു

പിതാവിന്റെ അവിഹിത ബന്ധം പുറത്തറിയാതിരിക്കാന്‍ മൂന്നു കുട്ടികളെ ബന്ധു വെടിവച്ചു കൊന്നു. ചണ്ഡിഗഢിലെ പഞ്ച്കുലയില്‍ ഞായറാഴ്ചയാണ് ഒരു കുടുംബത്തിലെ സഹോദരങ്ങളെ കൊലപ്പെടുത്തിയത്. സമര്‍ (3), സമീര്‍ (11), സിമ്രാന്‍ ‍(8) എന്നിവരാണ് കൊല്ലപ്പെട്ടത്.

സംഭവത്തില്‍ കുട്ടികളുടെ പിതാവായ സോനു മാലികിനെ പൊലീസ് അറസ്‌റ്റ് ചെയ്‌തു.

കുരുക്ഷേത്ര ജില്ലയിലെ പെഹോവയിലെ സര്‍സയിലുള്ള ഒരു കുടുംബത്തിലെ കുട്ടികളാണ് കൊല്ലപ്പെട്ടത്. സോനുവിന്റെ അവിഹിത ബന്ധം കുട്ടികള്‍ മുഖേനെ പുറത്തറിയുമെന്ന സാഹചര്യമുണ്ടായതോടെ ഇയാളുടെ ബന്ധു ജഗ്ദീപ് മാലികി (26) ന്റെ സഹായത്തോടെ കുട്ടികളെ വെടിവച്ചു കൊന്ന് വനത്തില്‍ ഉപേക്ഷിക്കുകയായിരുന്നു.

ജഗ്ദീപ് മാലിക്കാണ് കുട്ടികളെ കൊന്നതെന്നാണ് പൊലീസിന്റെ നിഗമനം. സോനുവിന്റെ നിര്‍ദേശത്തെ തുടര്‍ന്നാണ് ഇയാള്‍ കൊല നടത്തിയതെന്നാണ് റിപ്പോര്‍ട്ട്. കൃത്യത്തില്‍ സോനുവിനുള്ള പങ്ക് വ്യക്തമാക്കിയെന്നും കുരുക്ഷേത്ര എസ്പി വ്യക്തമാക്കി.

ചൊവ്വാഴ്ചയാണ് മൃതദേഹങ്ങള്‍ കണ്ടെടുത്തത്. സോനുവിന് അവിഹിത ബന്ധം ഉണ്ടായിരുന്നതായി ഇയാളുടെ പിതാവ് പൊലീസിനോട് വ്യക്തമാക്കിയിട്ടുണ്ട്.