യുവതിക്കൊപ്പം മുറിയെടുത്ത യുവാവ് ഫ്ലാറ്റില്‍ മരിച്ച നിലയിൽ; പൊലീസിനെ വലച്ച് പെണ്‍കുട്ടിയുടെ മൊഴി!

യുവതിക്കൊപ്പം മുറിയെടുത്ത യുവാവിനെ ഫ്ലാറ്റില്‍ മരിച്ച നിലയിൽ കണ്ടെത്തിയ സംഭവത്തില്‍ ദുരൂഹത. കക്കോടി കിരാലൂർ മാടം കള്ളിക്കോത്ത് വീട്ടിൽ രൺദീപിനെയാണ് കൊട്ടാരം റോഡിലെ ജവഹർ അപാർട്ട്‌മെന്റില്‍ മരിച്ച നിലയിൽ കണ്ടെത്തിയത്.

വ്യാഴാഴ്‌ച യുവതിക്കൊപ്പം അപ്പാർട്ട്മെൻറിൽ മുറിയെടുത്ത രൺദീപിനെ വെള്ളിയാഴ്‌ച വൈകിട്ടാണ് മരിച്ച നിലയില്‍ കണ്ടെത്തിയത്. സംഭവത്തില്‍ ചേവായൂർ പൊലീസ് അന്വേഷണം ആരംഭിച്ചു.

ജിം ട്രെയിനറായ രണദീപ് ഫേസ്‌ബുക്ക് വഴിയാണ് യുവതിയുമായി അടുത്തതും പ്രണയത്തിലായതും. യുവതിക്കൊപ്പം മുറിയെടുത്ത വിവരം യുവാവ് സുഹൃത്തുക്കളെ ഫോണില്‍ വിളിച്ചറിയിക്കുകയും ചെയ്‌തു. വെള്ളിയാഴ്‌ച വൈകിട്ടോടെ വിവാഹക്കാര്യം സംസാരിച്ച രൺദീപ് യുവതിയുമായി തര്‍ക്കത്തിലേര്‍പ്പെട്ടു.

തര്‍ക്കം നീണ്ടതോടെ യുവാവ് ആത്മഹത്യാ പ്രവണത കാണിക്കാന്‍ തുടങ്ങിയെന്ന് യുവതി പൊലീസിനോട് പറഞ്ഞു. രൺദീപിന്റെ പെരുമാറ്റം ഭയപ്പെടുത്തുന്ന തരത്തിലായതോടെ പൊലീസിൽ വിവരമറിയിച്ചു. തുടര്‍ന്ന് താന്‍ ഫ്ലാറ്റില്‍ നിന്നും ഇറങ്ങിയോടുകയായിരുന്നു എന്നും യുവതി പറഞ്ഞു. സ്‌റ്റേഷനില്‍ എത്തിയാണ് യുവതി മൊഴി നല്‍കിയത്.

പൊലീസ് ഫ്ലാറ്റില്‍ എത്തിയപ്പോഴേക്കും യുവാവ് മരിച്ചിരുന്നു. ആത്മഹത്യയാണെന്ന പ്രാഥമിക നിഗമനത്തിലാണ് പൊലീസ്. ഇതര മതത്തിലുള്ള  പെൺകുട്ടിയുമായി അടുപ്പത്തിലായിരുന്ന രൺദീപിനെ പെൺകുട്ടിയുടെ വീട്ടുകാർ മർദ്ദിച്ചതായി ബന്ധുക്കള്‍ പറയുന്നു.