പൃഥ്വിരാജിന് നീതികിട്ടണം, പാര്‍വതി രംഗത്ത് !

പൃഥ്വിരാജുമായി ബന്ധപ്പെട്ട ഒരു വിവാദം ഈയടുത്തകാലത്ത് ഉയര്‍ന്നുപൊങ്ങിയിരുന്നു. ‘മൈ സ്റ്റോറി’ എന്ന സിനിമയ്ക്ക് ഡേറ്റ് നല്‍കുന്നതുമായി ബന്ധപ്പെട്ടായിരുന്നു വിവാദം. പൃഥ്വിരാജിന്‍റെ ഡേറ്റ് കിട്ടുന്നില്ല എന്ന പരാതിയുമായി സംവിധായിക രോഷ്നി ദിനകര്‍ സിനിമാസംഘടനകളെ സമീപിച്ചെന്നായിരുന്നു റിപ്പോര്‍ട്ടുകള്‍.

എന്നാല്‍ പിന്നീട് ഈ പ്രശ്നം പരിഹരിക്കപ്പെട്ടു. ചിത്രത്തിനായി രണ്ടാം ഷെഡ്യൂളില്‍ 14 ദിവസത്തെ ഡേറ്റ് പൃഥ്വി നല്‍കി. എന്നാല്‍ പ്രശ്നം പരിഹരിച്ചെങ്കിലും പൃഥ്വിക്കെതിരെ ചില മാധ്യമങ്ങള്‍ റിപ്പോര്‍ട്ട് നല്‍കിക്കൊണ്ടേയിരുന്നു. ഇതിനെതിരെ മൈ സ്റ്റോറിയില്‍ പൃഥ്വിയുടെ നായികയായ പാര്‍വതി രംഗത്തുവന്നിരിക്കുകയാണ്.

പൃഥ്വിക്കെതിരായ ഇത്തരം പ്രചരണങ്ങള്‍ ക്രൂരമാണെന്നാണ് പാര്‍വതി പറയുന്നത്. “ഇപ്പോള്‍ പൃഥ്വിക്കെതിരെ ഉയര്‍ന്നിരിക്കുന്ന ആരോപണങ്ങള്‍ അസത്യമാണ്. ക്രൂരതയാണ്” - സിഫിക്ക് അനുവദിച്ച അഭിമുഖത്തില്‍ പാര്‍വതി വ്യക്തമാക്കി. 

“ഈ സിനിമയ്ക്കായി പൃഥ്വി ഡേറ്റ് നിഷേധിച്ചു എന്ന തരത്തിലുള്ള വാര്‍ത്തകള്‍ വാസ്തവവിരുദ്ധമാണ്. ‘മൈ സ്റ്റോറി’ ടീമുമായി ഞങ്ങള്‍ എപ്പോഴും ബന്ധപ്പെട്ടുകൊണ്ടുതന്നെയാണ് ഇരുന്നത്. രണ്ടാം ഷെഡ്യൂള്‍ എന്നുതുടങ്ങും എന്നതിനെക്കുറിച്ച് ‘ഞങ്ങള്‍ അറിയിക്കാം’ എന്നാണ് അവര്‍ പറഞ്ഞിരുന്നത്. ഷൂട്ടിംഗ് ആരംഭിക്കുന്നതിന് കുറച്ചുദിവസം മുമ്പ് അറിയിക്കണമല്ലോ. പൃഥ്വി ഡേറ്റ് നല്‍കിയില്ല എന്ന വാര്‍ത്തയൊക്കെ അസത്യവും ക്രൂരതയുമാണ്” - പാര്‍വതി പറയുന്നു.

“മൈ സ്റ്റോറിയുടെ ആദ്യ ഷെഡ്യൂളില്‍ മറ്റ് ഏത് സിനിമാഷൂട്ടിംഗും പോലെ ചില വെല്ലുവിളികള്‍ ഉണ്ടായിരുന്നു. എന്നാല്‍ എല്ലാവരും ഒത്തുചേര്‍ന്നുനിന്ന് അതെല്ലാം പരിഹരിച്ചു. അതുകൊണ്ടാണ് ഇത്തരം വ്യാജവാര്‍ത്തകളില്‍ ഇത്ര വേദന തോന്നുന്നത്” - പാര്‍വതി പറയുന്നു.