Dominic and the Ladies' Purse: കാണാതായ ആ പഴ്സ് ആരുടേതാണ്? 'കലൂരിലെ ഷെർലക് ഹോംസി'ന്റെ കേസ് അന്വേഷണം രണ്ടര മണിക്കൂർ

ആദ്യം മുതൽ അവസാനം വരെ രസകരമായി കഥ പറയുന്ന ഒരു കോമഡി ഇൻവെസ്റ്റിഗേഷൻ ത്രില്ലറായിരിക്കും ഈ സിനിമയെന്നതാണ് ട്രെയിലർ നൽകുന്ന സൂചന.

ഈ വർഷത്തെ ആദ്യ സിനിമയുമായി മമ്മൂട്ടിയും കൂട്ടരും ജനുവരി 23 ന് എത്തും. മമ്മൂട്ടിയെ നായകനാക്കി ഗൗതം വാസുദേവ് മേനോൻ സംവിധാനം ചെയ്യുന്ന ചിത്രമാണ് ഡൊമിനിക് ആൻഡ് ദി ലേഡീസ് പേഴ്സ്. ആദ്യം മുതൽ അവസാനം വരെ രസകരമായി കഥ പറയുന്ന ഒരു കോമഡി ഇൻവെസ്റ്റിഗേഷൻ ത്രില്ലറായിരിക്കും ഈ സിനിമയെന്നതാണ് ട്രെയിലർ നൽകുന്ന സൂചന. 

രണ്ട് മണിക്കൂർ 33 മിനിറ്റാണ് മമ്മൂട്ടി-ഗൗതം മേനോൻ കൂട്ടുകെട്ടിന്റെ ഈ ത്രില്ലറിന്റെ റൺടൈം എന്ന് ഒടിടി പ്ലേ റിപ്പോർട്ട് ചെയ്യുന്നു. ചിത്രത്തിന് കട്ടുകൾ ഒന്നുമില്ലതെ യു/എ സർട്ടിഫിക്കറ്റ് ലഭിച്ചതായും സൂചനകളുണ്ട്. കലൂരിൽ ഡൊമിനിക് ഡിറ്റക്റ്റീവ്സ് എന്ന പേരിൽ ഡിറ്റക്റ്റീവ്സ് ഏജൻസി നടത്തുന്നവരാണ് മമ്മൂട്ടിയും ഗോകുൽ സുരേഷും. 'കലൂരിലെ ഷെർലക് ഹോംസി'ന്റെ കേസന്വേഷണമാണ് ഈ ചിത്രം പറയുന്നത്.  കാണാതായ ഒരു പഴ്‌സ് അന്വേഷിച്ചുള്ള ഓട്ടം അവരെ കൂടുതൽ സങ്കീർണ്ണമായ സാഹചര്യങ്ങളിലേക്ക് എത്തിക്കുന്നതാണ് ചിത്രത്തിന്റെ ഇതിവൃത്തം.

ഡോക്ടർ സൂരജ് രാജൻ, ഡോക്ടർ നീരജ് രാജൻ എന്നിവർ ചേർന്നാണ് ചിത്രം രചിച്ചിരിക്കുന്നത്. ഡൊമിനിക്കിന്റെ ഡയറിക്കുറിപ്പുകള്‍ എന്ന തലക്കെട്ടോടെ, ചിത്രത്തില്‍ മമ്മൂട്ടി അവതരിപ്പിക്കുന്ന സി ഐ ഡൊമിനിക്കിന്റെ ഡിറ്റക്റ്റീവ് ഡയറിയിലെ വിവരങ്ങൾ കഴിഞ്ഞ ദിവസങ്ങളിലായി അണിയറ പ്രവർത്തകർ പുറത്തുവിട്ടിരുന്നു. ദുല്‍ഖര്‍ സല്‍മാന്റെ ഉടമസ്ഥതയിലുള്ള വേഫേറര്‍ ഫിലിംസ് കേരളത്തില്‍ വിതരണം ചെയ്യുന്ന ഈ ചിത്രം, മമ്മൂട്ടി കമ്പനിയുടെ ബാനറില്‍ മമ്മൂട്ടി നിര്‍മ്മിക്കുന്ന ആറാമത്തെ ചിത്രമാണ്.