Dominic and The Ladies Purse Box Office Collection: സമ്മിശ്ര പ്രതികരണങ്ങള്‍ക്കിടയിലും പിടിച്ചുനിന്ന് ഡൊമിനിക്; ക്ലിക്കായത് 'മമ്മൂട്ടി കമ്പനി' ഗ്യാരണ്ടി
ആദ്യ ഷോയ്ക്കു ശേഷം സമ്മിശ്ര പ്രതികരണങ്ങളാണ് ചിത്രത്തിനു ലഭിച്ചത്. എന്നാല്‍ 'മമ്മൂട്ടി കമ്പനി' ഫാക്ടര്‍ ബോക്‌സ്ഓഫീസില്‍ ക്ലിക്കായി
Dominic and The Ladies Purse Box Office Collection: സമ്മിശ്ര പ്രതികരണങ്ങള്‍ക്കിടയിലും ബോക്‌സ്ഓഫീസില്‍ പിടിച്ചുനിന്ന് ഡൊമിനിക് ആന്റ് ദി ലേഡീസ് പേഴ്‌സ്. റിലീസ് ദിനത്തില്‍ 1.5 കോടിയാണ് ചിത്രത്തിന്റെ ഇന്ത്യ നെറ്റ് കളക്ഷന്‍. ഫൈനല്‍ ഫിഗര്‍ വരുമ്പോള്‍ ഇത് 1.6 കോടിയിലേക്ക് എത്തിയേക്കും. വേള്‍ഡ് വൈഡ് കളക്ഷന്‍ ഉച്ചയോടെ പുറത്തുവരും. മാത്രമല്ല ആദ്യദിനം കേരളത്തില്‍ 200 സ്‌ക്രീനുകളിലാണ് ചിത്രം ഉണ്ടായിരുന്നത്. രണ്ടാം ദിനമായ ഇന്നത്തേക്ക് എത്തുമ്പോള്‍ അത് 225 സ്‌ക്രീനുകളായി ഉയര്‍ന്നിട്ടുണ്ട്. കഴിഞ്ഞ 24 മണിക്കൂറിനിടെ ബുക്ക് മൈ ഷോയില്‍ മാത്രം ഡൊമിനിക്കിന്റേതായി 47,000 ടിക്കറ്റുകളാണ് വിറ്റുപോയിരിക്കുന്നത്.
ആദ്യ ഷോയ്ക്കു ശേഷം സമ്മിശ്ര പ്രതികരണങ്ങളാണ് ചിത്രത്തിനു ലഭിച്ചത്. എന്നാല്‍ 'മമ്മൂട്ടി കമ്പനി' ഫാക്ടര്‍ ബോക്‌സ്ഓഫീസില്‍ ക്ലിക്കായി. മിനിമം ഗ്യാരണ്ടി ചിത്രങ്ങളാണ് മമ്മൂട്ടി കമ്പനിയില്‍ നിന്ന് ലഭിക്കുകയെന്ന പ്രേക്ഷകരുടെ പ്രതീക്ഷയാണ് റിലീസ് ദിനത്തില്‍ 'ഡൊമിനിക് ആന്റ് ദി ലേഡീസ് പേഴ്‌സി'നു രക്ഷയായത്. മമ്മൂട്ടി കമ്പനിയുടെ സിനിമയെന്ന നിലയില്‍ ഈ വീക്കെന്‍ഡില്‍ മികച്ച കളക്ഷന്‍ നേടാനായാല്‍ ചിത്രം മുടക്കുമുതല്‍ തിരിച്ചുപിടിച്ചേക്കും. ഇതുവരെ റിലീസ് ചെയ്ത മമ്മൂട്ടി കമ്പനി സിനിമകളൊന്നും ബോക്‌സ്ഓഫീസില്‍ പരാജയമായിട്ടില്ല. മമ്മൂട്ടി കമ്പനിയുടെ ആറാമത്തെ സിനിമയാണ് 'ഡൊമിനിക് ആന്റ് ദി ലേഡീസ് പേഴ്‌സ്'.
ഗൗതം വാസുദേവ് മേനോന്‍ ആദ്യമായി മലയാളത്തില്‍ സംവിധാനം ചെയ്ത 'ഡൊമിനിക് ആന്റ് ദി ലേഡീസ് പേഴ്‌സ്' ഒരു കോമഡി - ഇന്‍വസ്റ്റിഗേഷന്‍ ത്രില്ലറാണ്. സി.ഐ.ഡൊമിനിക് എന്ന പ്രൈവറ്റ് ഡിറ്റക്ടീവിന്റെ വേഷത്തിലാണ് മമ്മൂട്ടി അഭിനയിച്ചിരിക്കുന്നത്. ഗോകുല്‍ സുരേഷ്, സുഷ്മിത ബട്ട്, വിനീത്, വിജയ് ബാബു, വിജി വെങ്കടേഷ്, മീനാക്ഷി ഉണ്ണികൃഷ്ണന്‍, ലെന എന്നിവരും ചിത്രത്തില്‍ അഭിനയിച്ചിട്ടുണ്ട്. 2025 ല്‍ റിലീസ് ചെയ്യുന്ന ആദ്യ മമ്മൂട്ടി ചിത്രം കൂടിയാണ് ഡൊമിനിക്.
