റിമയ്ക്കും രമ്യയ്ക്കും ‘അമ്മ’യോട് ശത്രുത, അവർ 4 പേരും പുറത്തുപോകുന്നത് തന്നെയാണ് നല്ലത്: ഗണേഷ് കുമാറിന്റെ ഫോൺ സംഭാഷണം പുറത്ത്
രഹസ്യമായി പറഞ്ഞതെല്ലാം പരസ്യമായി! - ഗണേഷിന് ഇനി വേറെ വഴിയില്ല?
Publish Date: Sat, 30 Jun 2018 (12:10 IST)
Updated Date: Sat, 30 Jun 2018 (12:14 IST)
ദിലീപിനെ അമ്മയിലേക്ക് തിരിച്ചെടുത്തതുമായി ബന്ധപ്പെട്ട് നടിമാരായ ഭാവന, റിമ കല്ലിങ്കൽ, രമ്യ നമ്പീശൻ, ഗീതു മോഹൻദാസ് തുടങ്ങിയവർ അമ്മയിൽ നിന്നും രാജി വെച്ചിരുന്നു. എന്നാൽ, ഇവർ നാല് പേരും പുറത്തുപോകുന്നത് തന്നെയാണ് നല്ലതെന്ന് ഗണേഷ് കുമാർ.
രാജിവെച്ച നടിമാര് സിനിമയിലോ സംഘടനയിലോ സജീവമല്ല. സംഘടനയുടെ മെഗാ ഷോയിലും ഈ നടിമാര് സഹകരിച്ചിട്ടില്ല. ഇവര് പുറത്ത് പോകുന്നതും പുതിയ സംഘടനയുണ്ടാക്കുന്നതും നല്ല കാര്യമാണെന്ന് ഗണേഷ് അമ്മയുടെ ജനറല് സെക്രട്ടറിയായ ഇടവേള ബാബുവിന് അയച്ച ശബ്ദ സന്ദേശത്തിൽ പറയുന്നു. ഈ നടിമാര് സ്ഥിരമായി പ്രശ്നങ്ങള് സൃഷ്ടിക്കുന്നവരാണെന്ന് ഇദ്ദേഹം പറയുന്നു.
നടിമാര് സംഘടനയോടെ ശത്രുത ഉള്ളവരാണെന്ന് സന്ദേശത്തിൽ പറയുന്നു. സിനിമയിലെ നടീനടന്മാരുടെ ക്ഷേമത്തിന് വേണ്ടിയാണ് അമ്മ രൂപീകരിച്ചത്. ജനപിന്തുണ തേടി പ്രവര്ത്തിക്കാന് ഇത് രാഷ്ട്രീയ പ്രസ്ഥാനമല്ലെന്നാണ് ഗണേഷിന്റെ പക്ഷം. മാതൃഭൂമി ന്യൂസാണ് ഇക്കാര്യം പുറത്തുവിട്ടത്.
