ഒരാളുമായി പ്രണയത്തിലാണ്, അതുപക്ഷേ നിഷാന്ത് പിറ്റിയല്ല, സമയമാകുമ്പോൾ പറയുമെന്ന് കങ്കണ

ഈസ് മൈ ട്രിപ്പ് സഹസ്ഥാപകന്‍ നിഷാന്ത് പിറ്റിയുമായി പ്രണയത്തിലാണെന്ന വാര്‍ത്തകള്‍ തള്ളി നടി കങ്കണ റണാവത്ത്. നിഷാന്ത് സന്തോഷകരമായ കുടുംബജീവിതം നയിക്കുന്ന ആളാണെന്നും ഒന്നിച്ച് ചിത്രങ്ങള്‍ എടുത്തെന്ന് കരുതി ഒരാളെ വ്യക്തിഹത്യ ചെയ്യരുതെന്നും കങ്കണ ഇന്‍സ്റ്റഗ്രാമില്‍ കുറിച്ചു. അതേസമയം താന്‍ ഒരാളുമായി പ്രണയത്തിലാണെന്നും അതാരാണെന്നുള്ളത് സമയമാകുമ്പോള്‍ പറയാമെന്നും താരം കൂട്ടിചേര്‍ത്തു.

ഒരുമിച്ച് ചിത്രങ്ങള്‍ എടുക്കുന്നതിന്റെ പേരില്‍ മാത്രം ഒരു യുവതിയെ ഒരു പുരുഷനുമായി ബന്ധപ്പെടുത്തി പറയുന്നത് ശരിയല്ല. അയോധ്യയിലെ രാമക്ഷേത്ര പ്രാണ പ്രതിഷ്ടാ ചടങ്ങിനെത്തിയപ്പോഴാണ് ഇരുവരും ഒന്നിച്ച് ചിത്രങ്ങളെടുത്തത്. ഈ ചിത്രങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിച്ചതോടെയാണ് ഇരുവരും തമ്മില്‍ പ്രണയത്തിലാണെന്ന വാര്‍ത്തകള്‍ വന്നത്.

നിലവില്‍ കങ്കണ തന്നെ സംവിധാനം ചെയ്യുന്ന എമര്‍ജന്‍സി എന്ന സിനിമയുടെ തിരക്കുകളിലാന് താരം. ചിത്രത്തില്‍ മുന്‍ ഇന്ത്യന്‍ പ്രധാനമന്ത്രി ഇന്ദിരാഗാന്ധിയായാണ് കങ്കണ വേഷമിടുന്നത്. മലയാളത്തില്‍ നിന്നും വിശാഖ് നായര്‍ ചിത്രത്തില്‍ ഒരു പ്രധാനവേഷത്തിലെത്തുന്നുണ്ട്.