ലിജോ ജോസ് പെല്ലിശ്ശേരിയുടെ 'മലൈക്കോട്ടൈ വാലിബന്‍'തിയറ്ററുകളില്‍ എത്താന്‍ ഇനി മണിക്കൂറുകള്‍ മാത്രം. ആക്ഷന്‍ ഡ്രാമയിലെ മോഹന്‍ലാല്‍ അവതരിപ്പിക്കുന്ന 'വാലിബന്‍' എന്ന കഥാപാത്രത്തിന്റെ കോമിക് ലുക്ക് സംവിധായകന്‍ പുറത്തിറക്കി.
സോഷ്യല്‍ മീഡിയയില്‍ പ്രൊഫൈല്‍ പിച്ചര്‍ മാറ്റി കൊണ്ടാണ് കോമിക് ലുക്ക് പോസ്റ്റര്‍ റിലീസ് ചെയ്തത്.
മലൈക്കോട്ടൈ വാലിബന്‍ രണ്ട് ഭാഗങ്ങളായി റിലീസ് ചെയ്യും. രണ്ടാം ഭാഗത്തിന്റെ ചിത്രീകരണത്തിനായി ലിജോ ജോസ് പെല്ലിശ്ശേരി വീണ്ടും മോഹന്‍ലാലിനൊപ്പം ചേരുമെന്ന് പ്രതീക്ഷിക്കുന്നു.
വാലിബന്‍ ഒരു മാസ് സിനിമയായി മാത്രം കാണരുതെന്ന് എന്നാണ് മോഹന്‍ലാല്‍ ആരാധകരോട് പറഞ്ഞത്. കഴിഞ്ഞദിവസം ട്വിറ്ററില്‍ നടത്തിയ ഫാന്‍ ചാറ്റിലാണ് ലാല്‍ മനസ്സ് തുറന്നത്.
'നമ്മുടെ സിനിമ മറ്റന്നാള്‍ ഇറങ്ങുകയാണ്. നല്ലതായി മാറട്ടെ എന്ന് പ്രാര്‍ഥിക്കാം. നല്ലത് സംഭവിക്കട്ടെ. നല്ലത് പ്രതീക്ഷിക്കാം. ഞാന്‍ നമ്മുടെ അഭിമുഖങ്ങളിലൊക്കെ പറഞ്ഞിരുന്നു, ഇത് ഭയങ്കര ഒരു മാസ് സിനിമ എന്ന് കരുതി മാത്രം. ആയിക്കോട്ടെ, മാസ് സിനിമ ആയിക്കോട്ടെ. പക്ഷേ അതിനകത്ത് ഒരു ക്ലാസ് ഉണ്ട്. ലിജോ ജോസ് പെല്ലിശ്ശേരിയുടെ ഒരു ക്ലാസ്, ഒരു മാജിക് ഉള്ള സിനിമയാണ്. അങ്ങനെയും കൂടി മനസില്‍ വിചാരിച്ചിട്ട് പോയി കാണൂ',- മോഹന്‍ലാല്‍ പറഞ്ഞു.
