മലയാള സിനിമയില്‍ തൊട്ടതെല്ലാം പൊന്നാക്കുകയാണ് മലയാളത്തിന്റെ മെഗാസ്റ്റാര്‍ മമ്മൂട്ടി. അവസാനമായി ഇറങ്ങിയ മമ്മൂട്ടി ചിത്രങ്ങളെല്ലാം തന്നെ പരീക്ഷണ ചിത്രങ്ങളായിരുന്നെങ്കില്‍ മമ്മൂട്ടി എന്ന താരത്തെ അഴിഞ്ഞാടാന്‍ വിടുന്ന സിനിമയായിരിക്കും വൈശാഖ് ഒരുക്കുന്ന ടര്‍ബോ എന്നാണ് ലഭിക്കുന്ന വിവരങ്ങള്‍. ഏറെ കാലമായി മമ്മൂട്ടിയില്‍ നിന്നും ഒരു ഫുള്‍ ടൈം എന്റര്‍ടൈനര്‍ വന്നിട്ട് എന്നതിനാല്‍ തന്നെ ടര്‍ബോ ബോക്‌സോഫീസില്‍ ഒരു കലക്ക് കലക്കുമെന്ന് ഉറപ്പാണ്.
ഇപ്പോഴിതാ ടര്‍ബോയ്ക്ക് പിന്നാലെ 2024ല്‍ തന്നെ മമ്മൂട്ടി സിനിമയായ ബസൂക്കയും തിയേറ്ററിലെത്തുമെന്ന സൂചനയാണ് വരുന്നത്. സിനിമയുടെ ഷൂട്ട് പാക്കപ്പായതായി സിനിമയുടെ അണിയറപ്രവര്‍ത്തകര്‍ സമൂഹമാധ്യമങ്ങളിലൂടെ അറിയിച്ചു. 2024 ഫെബ്രുവരി 23നായിരുന്നു ബസൂക്കയുടെ അവസാനവട്ട ഷൂട്ടിങ് ആരംഭിച്ചിരുന്നത്. തിരക്കഥാകൃത്ത് കലൂര്‍ ഡെന്നീസിന്റെ മകനായ ഡിനോ ഡെന്നീസാണ് സിനിമ സംവിധാനം ചെയ്യുന്നത്. ഒരു ഗെയിം ത്രില്ലറായാണ് സിനിമ പുറത്തിറങ്ങുന്നത്. ഗൗതം വാസുദേവ് മേനോനും സിനിമയില്‍ മമ്മൂട്ടിക്കൊപ്പം ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.
സിദ്ധാര്‍ഥ് ഭരതന്‍,ഷൈന്‍ ടോം ചാക്കോ,ഡീന്‍ ഡെന്നീസ് ബിഗ് ബി ഫെയിം സുമിത് നവല്‍,ദിവ്യാപിള്ള,ഐശ്വര്യ മേനോന്‍ എന്നിവരാണ് സിനിമയിലെ മറ്റ് താരങ്ങള്‍. തുടക്കം മുതല്‍ പ്രേക്ഷകനെ ഉദ്വേഗത്തിന്റെ മുള്‍മുനയില്‍ നിര്‍ത്തുന്നതാകും സിനിമയെന്നാണ് റിപ്പോര്‍ട്ടുകള്‍.
