അമല്‍ നീരദ് ചിത്രത്തില്‍ മമ്മൂട്ടിക്കൊപ്പം മോഹന്‍ലാലും?
അടുത്ത വര്‍ഷമായിരിക്കും ഈ സിനിമയുടെ ചിത്രീകരണം ആരംഭിക്കുക
'ബോഗയ്ന്‍വില്ല'യ്ക്കു ശേഷം അമല്‍ നീരദ് സംവിധാനം ചെയ്യുന്ന ചിത്രത്തില്‍ മമ്മൂട്ടിയും മോഹന്‍ലാലും കേന്ദ്ര കഥാപാത്രങ്ങളെ അവതരിപ്പിക്കും. മമ്മൂട്ടി കമ്പനിയും ആശീര്‍വാദ് സിനിമാസും ചേര്‍ന്നാണ് ചിത്രം നിര്‍മിക്കുക. സൂപ്പര്‍താരങ്ങളുടെ നിര്‍മാണ കമ്പനികള്‍ ഒന്നിച്ച് നിര്‍മിക്കുന്ന ആദ്യ സിനിമ കൂടിയായിരിക്കും ഇത്.
അടുത്ത വര്‍ഷമായിരിക്കും ഈ സിനിമയുടെ ചിത്രീകരണം ആരംഭിക്കുക. മഹേഷ് നാരായണന്‍ സംവിധാനം ചെയ്യുന്ന ചിത്രത്തില്‍ മമ്മൂട്ടിയും മോഹന്‍ലാലും ഒന്നിച്ചു അഭിനയിക്കുന്നുണ്ട്. ഈ സിനിമയുടെ ചിത്രീകരണം ഏതാനും ദിവസങ്ങള്‍ക്കു മുന്‍പാണ് ശ്രീലങ്കയില്‍ ആരംഭിച്ചത്. ശ്രീലങ്കയിലെ ചിത്രീകരണത്തിനു ശേഷം ഷെഡ്യൂള്‍ ബ്രേക്കിലാണ്. മമ്മൂട്ടിയും മോഹന്‍ലാലും മഹേഷ് നാരായണന്‍ സിനിമയില്‍ അഭിനയിക്കാന്‍ ശ്രീലങ്കയില്‍ എത്തിയിരുന്നു. ഫഹദ് ഫാസില്‍, കുഞ്ചാക്കോ ബോബന്‍ എന്നിവരും മഹേഷ് നാരായണന്‍ ചിത്രത്തിലുണ്ട്.
മഹേഷ് നാരായണന്‍ ചിത്രത്തിനു ശേഷം മമ്മൂട്ടി അഭിനയിക്കുക അമല്‍ നീരദ് ചിത്രത്തിലായിരിക്കും. സത്യന്‍ അന്തിക്കാട് ചിത്രത്തിനു ശേഷമായിരിക്കും ലാല്‍ അമല്‍ നീരദ് പ്രൊജക്ടില്‍ ജോയിന്‍ ചെയ്യുക. മഹേഷ് നാരായണന്‍ ചിത്രത്തില്‍ മോഹന്‍ലാലിന്റേത് സുപ്രധാന കാമിയോ റോള്‍ ആണെങ്കില്‍ അമല്‍ നീരദ് ചിത്രത്തില്‍ മമ്മൂട്ടിക്കും മോഹന്‍ലാലിനും തുല്യപ്രാധാന്യമുള്ള കഥാപാത്രങ്ങളായിരിക്കും.
