കോടികൾ പൊടിച്ച് പണിത ആഡംബര വസതി ആരാധകർക്കായി തുറന്ന് കൊടുത്ത് മമ്മൂട്ടി!

കൊച്ചി പനമ്പള്ളി ന​ഗറിൽ കോടികൾ വിലയുള്ള ഒരു ആഡംബര വസതി മമ്മൂട്ടിക്കുണ്ട്

നാൽപ്പത് വർഷത്തെ സിനിമാ ജീവിതം കൊണ്ട് മമ്മൂട്ടി ഒരുപാട് സമ്പാദിച്ചിട്ടുണ്ട്. കേരളത്തിലും ചെന്നൈയിലും താരത്തിനും കുടുംബത്തിനും ആഢംബര വസതികളുണ്ട്. സകുടുംബം മമ്മൂട്ടി കഴിഞ്ഞ കുറച്ച് വർഷങ്ങളായി താമസിക്കുന്നത് ചെന്നൈയിലാണ്. കൊച്ചി പനമ്പള്ളി ന​ഗറിൽ കോടികൾ വിലയുള്ള ഒരു ആഡംബര വസതി മമ്മൂട്ടിക്കുണ്ട്. നാല് വർഷം മുമ്പ് വരെ സകുടുംബം താരം ഇവിടെയായിരുന്നു താമസിച്ചിരുന്നത്. 

പിന്നീട് വൈറ്റില ജനതയിൽ അംബേലിപ്പാടം റോഡിൽ‌ പുതിയ വീട് പണിതതോടെ കുടുംബം അവിടേക്ക് താമസം മാറി. ആ വീടിന്റെ ദൃശ്യങ്ങളും കുറച്ച് മാസങ്ങൾക്ക് മുമ്പ് സോഷ്യൽമീഡിയയിൽ വൈറലായിരുന്നു. ഇഷ്ടതാരത്തിന്റെ വീട്ടിൽ ഒന്ന് പോകണമെന്ന് ആഗ്രഹുക്കാത്തവർ കുറവായിരിക്കും. അത്തരം ആ​ഗ്രഹങ്ങൾ ഉള്ളവർക്ക് ഒരു സുവർണ്ണാവസരം ഒരുങ്ങുകയാണ്. 

കോടികൾ പൊടിച്ച് പണിത ആഡംബര വസതി ആരാധകർക്കായി തുറന്ന് കൊടുക്കാൻ പോവുകയാണ് മമ്മൂട്ടിയും കുടുംബവും. പനമ്പള്ളി ന​ഗറിലെ വീട് സ്റ്റേക്കേഷൻ ആസ്വദിക്കാൻ ഇഷ്ടപ്പെടുന്നവർക്കായി തുറന്ന് കൊടുക്കാനാണ് മമ്മൂട്ടിയുടെ തീരുമാനം. തന്റെ വസതി ആളുകൾക്ക് അവധി ആഘോഷിക്കാനുള്ള റിസോർട്ട് മാതൃകയിലേക്ക് മാറ്റിയിരിക്കുകയാണ് മമ്മൂട്ടി. ഈ വീടിന്റെ മുക്കിലും മൂലയിലും ഒരു മമ്മൂ‌ട്ടി ടച്ചുണ്ട്. ബോട്ടിക് വില്ല മോഡലിലാണ് വസതിയുള്ളത്. മമ്മൂട്ടിയുടെ ആഡംബര വസതിയിലുള്ള സ്റ്റേക്കേഷനുള്ള ബുക്കിങ് ആരംഭിച്ച് കഴിഞ്ഞു.