കാത്തിരിപ്പിനൊടുവില്‍ ദൃശ്യം 2 പ്രേക്ഷകരിലേക്ക് എത്തിയിരിക്കുകയാണ്. സിനിമയുടെ പ്രമോ വീഡിയോ വന്നപ്പോള്‍ മുതല്‍ ചര്‍ച്ചയായത് മോഹന്‍ലാല്‍ മമ്മൂട്ടി ചിത്രത്തെ കുറിച്ച് പറയുന്ന ഒരു ഡയലോഗ് ആയിരുന്നു. ഏഴു വര്‍ഷങ്ങള്‍ക്കു ശേഷം തിയേറ്റര്‍ ഉടമയായി മാറിയ ജോര്‍ജുകുട്ടിയെ ഫോണിലൂടെ മമ്മൂട്ടിയുടെ റിലീസ് ഡേറ്റ് മാറ്റിയ വിവരം പറയുന്നതാകട്ടെ നിര്‍മ്മാതാവ് ആന്റോ ജോസഫ്. ഒരു ഫോണ്‍ കോളിലൂടെ ദൃശ്യം 2-ല്‍ അതിഥി വേഷത്തില്‍ എത്തിയിരിക്കുകയാണ് അദ്ദേഹം. സിനിമയില്‍ മമ്മൂട്ടി ചിത്രത്തിന്റെ ഡേറ്റ് മാറ്റി എന്ന് പറഞ്ഞപ്പോള്‍ അത് 'ദി പ്രീസ്റ്റ്'ന്റെ റിലീസ് മാറ്റിയ കാര്യമാണോ നിര്‍മ്മാതാവ് പറഞ്ഞത് എന്നാണ് പ്രേക്ഷകര്‍ ചോദിക്കുന്നത്.
പ്രേക്ഷകരുടെ സംശയം അങ്ങനെതന്നെ ഇരിക്കട്ടെ എന്ന് ഒരു ചെറു ചിരിയോടെ ആന്റോ ജോസഫ് മറുപടി നല്‍കി.നവാഗതനായ ജോഫിന്‍ ടി ചാക്കോ സംവിധാനം ചെയ്യുന്ന 'ദി പ്രീസ്റ്റ്' മാര്‍ച്ച് നാലിന് റിലീസ് ചെയ്യുന്നത്.മമ്മൂട്ടിയും മഞ്ജു വാര്യരും ആദ്യമായി ഒന്നിക്കുന്നത് ബിഗ് സ്‌ക്രീനില്‍ കാണുവാനായി കാത്തിരിക്കുകയാണ് ഓരോ ആരാധകരും. വര്‍ഷങ്ങളായി ഇരുവരും സിനിമയില്‍ ഉണ്ടെങ്കിലും ഇതുവരെയും മമ്മൂട്ടിയ്ക്കൊപ്പം തനിക്ക് അഭിനയിക്കാന്‍ ആകാത്തത് നിരാശ മഞ്ജു നേരത്തെ പങ്കുവെച്ചിരുന്നു.ആന്റോ ജോസഫും ബി ഉണ്ണികൃഷ്ണനും ചേര്‍ന്നാണ് ചിത്രം നിര്‍മ്മിക്കുന്നത്.
