അജയ് ജ്ഞാനമുത്തു സംവിധാനം ചെയ്‌ത തമിഴ് ചിത്രമായ ഇമൈക്കാ നൊടികൾ ആഗസ്‌റ്റ് 30ന് റിലീസിനെത്തുകയാണ്. ലേഡി സൂപ്പർസ്‌റ്റാർ നയൻതാരയാണ് ചിത്രത്തിൽ നായികയായെത്തുന്നത്. ത്രില്ലർ സ്വഭാവമുള്ള ചിത്രത്തിൽ അഥർവ്വ, ബോളിവുഡ് സംവിധായകൻ ജ്ഞാനമുത്തു എന്നിവർ പ്രധാന വേഷങ്ങളിലെത്തുന്നു.
എന്നാൽ ഈ ചിത്രത്തിൽ മമ്മൂട്ടിയായിരുന്നു ആദ്യം അഭിനയിക്കാനിരുന്നത്. സംവിധായകനായ അജയ് ജ്ഞാനമുത്തു തന്നെയാണ് ഇക്കാര്യം തുറന്നുപറഞ്ഞത്. 2014ൽ ചിത്രത്തിന്റെ തിരക്കഥയുമായി മമ്മൂട്ടിയെ സമീപിക്കുകയും അദ്ദേഹത്തിന് തിരക്കഥ ഇഷ്‌ടമാകുകയും ചെയ്‌തിരുന്നു.
പിന്നീട്, സ്‌ത്രീവേഷം കേന്ദ്ര കഥാപാത്രമായിരിക്കുന്നതായിരിക്കും നല്ലതെന്ന് തോന്നി കഥയിൽ ഒരുപാട് മാറ്റങ്ങൾ വരുത്തുകയായിരുന്നു. ആ സ്‌ത്രീ കഥാപാത്രം ചെയ്യാൻ നയൻതാര ആയിരിക്കും നല്ലതെന്ന് തോന്നി. അതിന് ശേഷം കഥയുമായി നയൻതാരയെ സമീപിക്കുകയായിരുന്നു. ഒരു പൊലീസ് ഓഫീസറായാണ് നയൻതാര ചിത്രത്തിൽ പ്രത്യക്ഷപ്പെടുന്നത്.
ബോളിവുഡ് സംവിധായകനും നിര്‍മ്മാതാവുമായ അനുരാഗ് കശ്യപിന്റെ ആദ്യ തമിഴ് സിനിമയെന്ന പ്രത്യേകതയും ഈ ചിത്രത്തിനുണ്ട്. സീരിയല്‍ കൊലപാതകങ്ങള്‍ നടത്തുന്ന സൈക്കോയായി അനുരാഗ് കശ്യപും വേഷമിടുന്നു.