അമ്മയില്‍ നിന്നും മമ്മൂട്ടിയും ഇന്നസെന്റും സ്ഥാനമൊഴിയുന്നു, പ്രസിഡന്റാകാന്‍ മോഹന്‍ലാല്‍?

പൃഥ്വിരാജ് മതിയെന്ന് യുവതാരങ്ങള്‍, താല്‍പ്പര്യമില്ലെന്ന് പൃഥ്വി

താരസംഘടനയായ അമ്മയില്‍ നേത്രത്വമാറ്റം ആവശ്യമാണെന്ന് കൂടുതല്‍ താരങ്ങള്‍. നാലു തവണ പ്രസിഡന്റായ സ്ഥിതിക്ക് ഇത്തവണ സ്ഥാനം ഒഴിയും എന്ന് ഇന്നസെന്റ് പരസ്യമായി പ്രഖ്യാപിച്ചതോടെയാണ് പുതിയ ആളുകളെ സംഘടനയുടെ നേതൃത്വ നിരയിലേക്ക് നിയമിക്കുമെന്ന സൂചനകള്‍ വരുന്നത്. 

നിലവില്‍ ഇന്നസെന്റാണ് പ്രസിഡന്റ്. മോഹന്‍ലാല്‍ വൈസ് പ്രസിഡന്റാണ്. ഇടവേള ബാബുവാണ് ജനറല്‍ സെക്രട്ടറി. നേരത്തേ നടി ആക്രമിക്കപ്പെട്ട കേസില്‍ നടന്‍ ദിലീപിന് അനുകൂലമായിട്ടായിരുന്നു ആദ്യം മുതിര്‍ന്ന താരങ്ങള്‍ നിലപാടെടുത്തത്. എന്നാല്‍, ഇക്കാര്യത്തില്‍ അന്നേ ഒരു കൂട്ടം താരങ്ങള്‍ക്ക് എതിര്‍പ്പായിരുന്നു ഉണ്ടായിരുന്നത്. 

വൈസ് പ്രസിഡന്റായ മോഹന്‍ലാല്‍ പ്രസിഡന്റാകണം എന്ന് ഒരു വിഭാഗം ആവശ്യപ്പെടുന്നുണ്ട്. ബാലചന്ദ്രമേനോന്‍ വരണമെന്ന് ആഗ്രഹിക്കുന്നവരാണ് മുതിര്‍ന്ന താരങ്ങള്‍. അതോടൊപ്പം, പ്രസിഡന്റ് സ്ഥാനത്തേക്ക് യുവതാരങ്ങള്‍ നിര്‍ദേശിക്കുന്ന പേര് പൃഥ്വിരാജിന്റേതാണ്. എന്നാല്‍, പൃഥ്വി വിസമ്മതിക്കുന്നതിനാല്‍ യുവ താരങ്ങള്‍ സമ്മര്‍ദ്ദം ചൊലുത്തുമെന്നാണ് സൂചന. 

അമ്മയുമായി ബന്ധപ്പെട്ട് ഉണ്ടായ വിവാദങ്ങളെ തുടര്‍ന്ന് അസംതൃപ്തനായ മമ്മൂട്ടിയും സ്ഥാനം ഒഴിയുമെന്നും സൂചനയുണ്ട്. ജൂണ്‍ മാസത്തിലാണു തെരഞ്ഞെടുപ്പു നടത്തുക.