കൈരളി ടിവിയോട് ക്ഷമ ചോദിച്ച് സംവിധായകന്‍ ഷാജി കൈലാസ്. കൈരളി ടിവിയില്‍ വല്യേയേട്ടന്‍ സിനിമ 1900 തവണ സംപ്രേഷണം ചെയ്തുവെന്ന് ഷാജി കൈലാസ് അവകാശപ്പെട്ടിരുന്നു. ഇതിനുപിന്നാലെ കൈരളി ടിവി രംഗത്ത് വന്നിരുന്നു. കൈരളി ചാനലിന്റെ സീനിയര്‍ ഡയറക്ടര്‍ വെങ്കിട്ടരാമനാണ് ഇക്കാര്യം വ്യക്തമാക്കിയത്. കൈരളി ഈ സിനിമ 1880 തവണ കാണിച്ചുവെന്ന നിര്‍മ്മാതാക്കള്‍ അവകാശപ്പെട്ടുവെന്നും ഈ അവകാശം വസ്തുതാപരമല്ലെന്നും വിശേഷദിവസങ്ങളില്‍ മാത്രമാണ് ഈ സിനിമ പ്രദര്‍ശിപ്പിച്ചിട്ടുള്ളതെന്നും അദ്ദേഹം പറഞ്ഞു. പിന്നാലെ ഷാജി കൈലാസ് ഫേസ്ബുക്കിലൂടെ കൈരളി ടിവിയോട് ക്ഷമ ചോദിക്കുകയായിരുന്നു.
ഒരിക്കലും ചാനലിനെ ഇകഴ്ത്തി കാണിക്കാനായി പറഞ്ഞതല്ലെന്നും തനിക്ക് ഏറ്റവും പ്രിയപ്പെട്ട ചാനലാണ് കൈരളി ചാനലെന്നും വര്‍ഷങ്ങളായി അവര്‍ക്കൊപ്പം സഞ്ചരിക്കുന്ന ആള്‍ കൂടിയാണ് താനെന്നും ഷാജി കൈലാസ് പറഞ്ഞു. വല്യേയേട്ടന്‍ കൈരളിയില്‍ നിരവധിതവണ പ്രദര്‍ശിപ്പിച്ചതില്‍ ഒരു സംവിധായകനെന്ന നിലയില്‍ തനിക്ക് അഭിമാനം ഉണ്ടെന്നും അദ്ദേഹം പറഞ്ഞു.
