9 വർഷത്തെ ഇടവേളയ്ക്ക് ശേഷം രാജ തിരിച്ചെത്തിയിരിക്കുകയാണ്. സ്ട്രോങ്ങായി തന്നെ. മമ്മൂട്ടി - വൈശാഖ് കൂട്ടുകെട്ടിൽ ഇന്ന് റിലീസ് ആയ മധുരരാജയെ മനഃപൂർവ്വം തകർക്കാനുള്ള ശ്രമമാണ് അണിയറയിൽ നടക്കുന്നതെന്ന് റിപ്പോർട്ടുകൾ.
ആദ്യ പകുതി കഴിയുന്നതിനു മുന്നേ രാജയുടെ എന്‍ട്രി ചിത്രീകരിച്ച് സമൂഹ മാധ്യമങ്ങളിലൂടെ പ്രചരിപ്പിക്കുകയാണ് ചിലർ. ഇത്തരത്തിലുള്ള എല്ലാ നീക്കങ്ങളേയും ചെറുക്കണമെന്ന് അണിയറപ്രവര്‍ത്തകരും ഫാന്‍സ് പ്രവര്‍ത്തകരുമൊക്കെ വ്യക്തമാക്കിയിരുന്നുവെങ്കിലും ചിലർ ഇതിനെയെല്ലം പുശ്ചത്തോടെയാണ് കാണുന്നതെന്ന് വ്യക്തം. മോഹൻലാലിന്റെ ചിത്രം ഡിപിയാക്കിയവരാണ് വീഡിയോ പ്രചരിപ്പിക്കുന്നതെന്ന് മമ്മൂട്ടി ആരാധകർ ആരോപിക്കുന്നു.
വീഡിയോ ഗ്രൂപ്പുകളിലൂടെ പ്രചരിക്കുന്നുണ്ടെന്ന വിവരം പുറത്തുവിട്ടത് ഫാന്‍സ് പ്രവര്‍ത്തകരാണ്. ഇതിനായി ഇടപെടണമെന്നും പെട്ടെന്ന് തന്നെ ഇത് തടയണമെന്നും വ്യക്തമാക്കിയുള്ള പോസ്റ്റ് ആരാധകർ ഏറ്റെടുത്ത് കഴിഞ്ഞു. ഇങ്ങനെയുണ്ടായാൽ സൈബര്‍ സെല്ലില്‍ വിളിച്ച് പറയാനും ലിങ്ക് വാട്‌സപിലൂടെ നല്‍കാനുമായിരുന്നു അണിയറപ്രവര്‍ത്തകര്‍ നിര്‍ദേശിച്ചത്.
എന്നാൽ, സൈബര്‍ സെല്ലിലേക്ക് വിളിച്ചുവെങ്കിലും പ്രതികരണില്ലെന്നുമുള്ള പോസ്റ്റും ഗ്രൂപ്പുകളിലുണ്ട്. രാജയുടെ എൻ‌ട്രിക്ക് പുറമേ സണ്ണി ലിയോണിന്റെ ഐറ്റം ഡാൻസിന്റെ ചിത്രങ്ങളും വീഡിയോകളും ചിലർ പ്രചരിപ്പിച്ച് തുടങ്ങി. പലയിടങ്ങളിലും ഷോ പൂര്‍ത്തിയാവുന്നതേയുള്ളൂ, അതിനിടയിലാണ് ഇത്തരത്തില്‍ സുപ്രധാന രംഗങ്ങളും ലീക്കായിട്ടുള്ളത്.