മമ്മൂട്ടിയുടെ മധുരരാജ തമിഴ്‌ സിനിമാ ലോകത്ത് ചര്‍ച്ചയാകുന്നു; ഏറ്റുമുട്ടി വിജയ്-സൂര്യ ആരാധകര്‍ - നിലപാടറിയിച്ച് അജു വര്‍ഗീസ്

മമ്മൂട്ടിയെ നായകനാക്കി വൈശാഖ് ഒരുക്കുന്ന മധുരരാജ മറ്റൊരു വിവദത്തിലേക്ക്. ചിത്രത്തില്‍ നടന്‍ അജു വര്‍ഗീസിന്റെ കഥാപാത്രത്തിന്റെ പേരാണ് തമിഴ്‌ സിനിമാ ലോകത്ത് ചര്‍ച്ചയായത്.

മധുരരാജയില്‍ അജു വര്‍ഗീസിന്റെ കഥാപാത്രത്തിന്റെ പേര് ‘സുരു’ എന്നാണ്. വിജയ് ആരാധകര്‍ സൂര്യയെ കളിയാക്കി വിളിക്കുന്ന പേരാണ് ‘സുരു’ എന്നതാണ് വിവാദങ്ങള്‍ക്ക് കാരണമായത്. ഇതോടെ കോലിവുഡില്‍ വിജയ്-സൂര്യ ആരാധകര്‍ തമ്മിലുള്ള പോരായി മാറി സംഭവം.

വിജയ് ആരാധകര്‍ അജുവിന് പിന്തുണ നല്‍കിയപ്പോള്‍ സൂര്യ ആരാധകര്‍ അജുവിന്റെ ഫേസ്‌ബുക്കില്‍ രൂക്ഷമായ ഭാഷയില്‍ വിമര്‍ശനവുമായി രംഗത്തെത്തി. ആരാധകര്‍ തമ്മില്‍ പോര് മുറുകിയതോടെ അജു വര്‍ഗീസ് തന്നെ നിലപാട് വ്യക്തമാക്കി രംഗത്ത് വന്നു.

സിനിമയിലെ തന്റെ കഥാപാത്രത്തിന്റെ പേര് താന്‍ ഇട്ടതല്ലെന്നും സൂര്യ ആരാധകര്‍ കരുതുന്ന പോലെ ആ വലിയ നടനെ കളിയാക്കാന്‍ വേണ്ടിയുവമല്ല ആ പേരിട്ടതെന്നും അജു വര്‍ഗീസ് തന്റെ ഫേസ്‌ബുക്കില്‍ കുറിച്ചു.

‘പ്രിയപ്പെട്ട സൂര്യ സര്‍ ഫാന്‍സ് അറിയുവാന്‍, മധുരരാജാ എന്ന സിനിമയിലെ എന്റെ പേര് ഞാന്‍ അല്ല ഇട്ടതു മാത്രം അല്ല അതും നിങ്ങള്‍ കരുതുന്ന പോലെ ആ വലിയ മനുഷ്യനെ കളിയാക്കാന്‍ വേണ്ടിയും അല്ല. അദ്ദേഹത്തിനെ ആരാധിക്കുന്ന ഫോക്കസ് ഔട്ടില്‍ നില്‍ക്കുന്ന ഒരുവന്‍’ - എന്നാണ് അജുവര്‍ഗീസിന്റെ ഫെയ്‌സ്ബുക്ക് പോസ്റ്റ്. എന്നാല്‍, ഈ പോസ്റ്റിന് താഴെയും സൂര്യ-വിജയ് ആരാധകര്‍ വന്‍ ഏറ്റുമുട്ടലുകളാണ് നടത്തുന്നത്.