Swasika Wedding: സിനിമ- സീരിയല്‍ നടി സ്വാസിക വിവാഹിതയായി. സീരിയല്‍ നടന്‍ പ്രേം ജേക്കബ് ആണ് വരന്‍. സ്വാസിക തന്നെയാണ് വിവാഹ ചിത്രങ്ങള്‍ ഇന്‍സ്റ്റഗ്രാമില്‍ പങ്കുവെച്ചത്. ചിത്രങ്ങള്‍ വൈറലായിരിക്കുകയാണ്. നേരത്തേ താനാണ് അങ്ങോട്ട് പ്രപ്പോസ് ചെയ്തതെന്ന് സ്വാസിക പറഞ്ഞിരുന്നു. മനം പോലെ മാംഗല്യം എന്ന സീരിയലിന്റെ സെറ്റില്‍ വച്ചാണ് സ്വാസികയും ജേക്കബും പ്രണയത്തിലാകുന്നത്. ജനുവരി 26നാണ് വിവാഹമെന്നായിരുന്നു സ്വാസിക നേരത്തേ പറഞ്ഞിരുന്നത്. എന്നാല്‍ മനഃപൂര്‍വം വിവാഹതിയതി മാറ്റിപ്പറഞ്ഞതെന്ന് താരം വ്യക്തമാക്കി.
താനും ഭര്‍ത്താവ് പ്രേം ജേക്കബും എല്ലാവര്‍ക്കും സര്‍പ്രൈസ് തരാന്‍ വേണ്ടിയാണ് ഇങ്ങനെ വിവാഹതിയതി മാറ്റിപ്പറഞ്ഞതെന്നാണ് താരം പറയുന്നത്. വിവാഹശേഷം മാധ്യമങ്ങളോട് സംസാരിക്കുകയായിരുന്നു ഇരുവരും. വിവാഹം വളരെ ലളിതമായി നടത്താനായിരുന്നു ഞങ്ങളുടെ ആഗ്രഹം. ഞങ്ങളുടെ കുടുംബാംഗങ്ങള്‍ക്കും ആഘോഷങ്ങളോട് താല്‍പര്യമില്ല. ഏറ്റവും വേണ്ടപ്പെട്ട നൂറോളം പേരെ മാത്രമാണ് വിവാഹത്തിന് ക്ഷണിച്ചത്. അതുകൊണ്ടാണ് വിവാഹ തീയതി മറച്ചുവെച്ചത്. ഒരു സീരിയലില്‍ മാത്രമാണ് ഞങ്ങള്‍ ഒരുമിച്ചഭിനയിച്ചത്. വിവാഹ ശേഷം ഒരുമിച്ച് കൂടുതല്‍ അവസരങ്ങള്‍ കിട്ടുമെന്ന് പ്രതീക്ഷിക്കുന്നു- സ്വാസിക പറഞ്ഞു. സുരേഷ് ഗോപി, ദിലീപ്, അനുശ്രീ, ശ്വേതാ മേനോന്‍, ഇടവേള ബാബു, രചന നാരായണന്‍ കുട്ടി തുടങ്ങിയവര്‍ ചടങ്ങില്‍ പങ്കെടുത്തു.
