ടോവിനോ തോമസിന്റെ ഓണം റിലീസാണ് 'അജയന്റെ രണ്ടാം മോഷണം'.നവാഗതനായ ജിതിൻ ലാൽ സംവിധാനം ചെയ്യുന്ന ചിത്രം നടന്റെ കരിയറിലെ ആദ്യ ട്രിപ്പിൾ റോൾ കൂടിയാണ്.സിനിമയിൽ സുരഭി ലക്ഷ്മി, ഐശ്വര്യ രാജേഷ്, കൃതി ഷെട്ടി എന്നിവരാണ് നായികമാർ എത്തുന്നത്. സിനിമയെ കുറിച്ചുള്ള പ്രതീക്ഷകൾ പങ്കുവെക്കുകയാണ് ടോവിനോ തോമസ്.
"മൂന്ന് വേഷവും നാലു വേഷവും പത്തു വേഷവുമൊക്കെ കമൽഹാസൻ മാത്രമേ ചെയ്തു കണ്ടിട്ടുള്ളൂ. അത്രയും വലിയ ലെവലിൽ നമ്മൾ എത്തിയിട്ടില്ലെന്നും എത്തിയില്ലെന്നും നല്ല ബോധ്യമുണ്ട്. അതിൻറെ പകുതിയിലേക്ക് എങ്കിലും എത്തണമെന്ന് ഉണ്ടായിരുന്നു. അതിനു വേണ്ടി നല്ല രീതിയിൽ കഷ്ടപ്പെട്ടിട്ടുണ്ട്. പിന്നെ ഇപ്പോൾ പ്ലാൻ ഇന്ത്യൻ എന്ന് എപ്പോഴും പറഞ്ഞുകൊണ്ടിരിക്കുകയാണ്. എല്ലായിടത്തുമുള്ള ഓഡിയൻസിന് കൂടി കണക്ട് ആയാൽ മാത്രമേ പ്ലാൻ ഇന്ത്യൻ ഹിറ്റ് ആകുകയുള്ളൂ. അല്ലെങ്കിൽ പാൻ ഇന്ത്യൻ നാറ്റമാകും. സംഗതി കൈയീന്ന് പോയാൽ എല്ലാം നാട്ടിലും നാറുമെന്ന് നല്ല ബോധ്യമുണ്ട്. ആ ഒരു കാരണം നമ്മുടെ ഉത്തരവാദിത്വം കൂട്ടുകയാണ് ചെയ്തത്. ഓരോ ചെറിയ കാര്യത്തിലും മാക്സിമം ശ്രദ്ധ കൊടുക്കാനാണ് ചെയ്തു വച്ചിട്ടുള്ളത്.",-ടോവിനോ തോമസ് പറഞ്ഞു.
